Bya Ronald Mukasa
Mmengo – Kyaddondo
Nnaabagereka Sylvia Nagginda Luswata atongozza Ekisaakaate kya Nnaabagereka 2025 ekigenda okuyindira ku ssomero lya St. Janan School era naasaba abazadde n’amasomero okuteeka essira ku nnimi ennansi kibayambe okwongera okutegeera ensonga.
Ekisaakaate kino kitongozeddwa leero ku Lwokusatu mu Bimuli bya Bulange e Mmengo era Nnaabagereka asinzidde wano neyeebaza aba Homesdalane olw’okuteekateeka Ekisaakaate 2024.
Nnaabagereka Sylvia Nagginda yennyamidde olw’amasomero okunnyikiza oluliiko oluzungu mu baana ne babeerabiza ennimi enzaaliranwa. Nnaabagereka asabye amasomero okukulembeza ennimi ezaffe zinaasangwa oluzungu ebeera nnyongereza kubanga n’abazungu a aleeta oluzungu kuno boogera nnimiro zaabwe
Ono ategeezezza nti ekisaakaate 2025 kyakuyamba nnyo mu kuzimba abaana abato okusingira ddala mu buntubulamu saako nokusaasaanya ebikwata ku Nnono zaffe n’obuwangwa ku muyungagano gwa yintanenti n’emikutu emirala okusobola okubimanyisa abalala.
Nnaabagereka yeebaziiza nnyo banna mukago abeesowoddeyo okubeera ekitundu mu nteekateeka y’ekisaakaate okukisobozesa okugenda mu maaso.
Ye Minisita w’Ekikula ky’Abantu Cotildah Nakate kikomeko annyonnyodde nti enteekateeka y’ekisaakaate yankizo nnyo mu lutabaalo lw’okuzza Buganda ku ntikko ngesimbira ddala mu nsonga ssemasonga ettaano, omuli okukuuma n’okutaasa Nnamulondo.
Owek. Kikomeko agasseeko nti Ekisaakaate kitambulira mu kulungamiza kwa Maasomoogi okw’amatikkira ogw’omulundi ogwa 31 mweyakubiririza abantu be okukuuma n’okunyweza obumu.
Ssenkulu wa Nnaabagereka Foundation Andrew Adrian Mukiibi asinzidde ku mukolo guno nayanjula omulamwa gw’Ekisaakaate 2025 nga kigenda kubeera wansi w “okukwanaganya Obuwangwa bwaffe ne Tekinologiya” kisobozese abavubuka okumanya n’okutegeera Obuvo n’Obuddo bwabwe.
Akulira kkampuni ya MTN, Sylvia Mulinge agamba nti Ekisaakaate kikoze nnyo nnyo mukunjula nokuteekateeka miti emito okubafuula abantu era abakulembeze ab’omugaso mu ggwanga bayambeko okukyuusa ensi.
Omutandisi w’amasomero ga Janan era abagenda okuteekateeka Ekisaakaate 2025, Omuk. Michael Kironde yeebazizza Nnaabagereka olw’okubawa omukisa okuddamu okuteekateeka ekisaakaate nasuubiza nti bakusukkuluma bwe bakola mu mwaka gwa 2017.
Ono era yebaziiza banaabwe aba Homisdalene abateekateeka Ekisaakaate omwaka 2024 olw’okukola obulungi era nebawaayo obukadde bw’ensimbi 10 eri abaana abava mu maka amankuseere mu masaza ga Buganda nabo okufuna omukisa basobole okwetabamu.
Kinajjukirwa nti guno gugenda kubeera mulundi gwa 18 ng’Ekisaakaate kino kitegekebwa okuzza empisa n’ennono z’Obuntubulamu mu bantu era omulundi guno kigenda kuyindira ku ssomero lya Janan e Bombo.