Bya Francis Ndugwa
Bulange – Mmengo
Omumyuuka Owookubiri owa Katikkiro era Omuwanika w’Obwakabaka, Owek.Robert Waggwa Nsibirwa asabye Obuganda okuboola emikutu gya bannakigwanyizi abeefunyiridde okumetta Obwakabaka enziro basobole okubunafuya.
Obubaka buno Owek. Nsibirwa okusaba kuno akukoledde Mmengo mu bimuli bya Bulange ku Lwokuna bw’abadde akiikiridde Katikkiro Charles Peter Mayiga okutikkula Oluwalo lwa bukadde 43 n’omusobyo okuva mu Bannakyaddondwa ne Bannabuweekula.
“Batambuza obulimba, omwezi gumu ebiri, oli nayogera kino nekiri nga talina wadde akayigo abantu webasobola okukyama naye amazima gamala negavaayo. Njagala okubasaba muleme kuggwamu maayi amazima weegali, amazima gava mbuga. Abalimba mubaboole, bwemubagamba nti mubaboole nga bongezzaamu ggiya naye tetukyatya kuba abantu baffe tulina okubamanyisa amazima,” Owek. Robert Waggwa Nsibirwa bw’ategeezezza.
Ono annyonnyodde nti bulijjo kyabulabe nnyo okulimba, okuvvoola era naabasaba banywerere ku nnambika ya Nnyinimu kubanga amazima bagamanyi era geeyolese.
Bano abakuutidde okunyweza obumu wadde ebintu bulijjo bajja kubeera nga babiraba bulala naye bawang’ane ekitiibwa basobole okubeera obumu olwo Buganda esobole okutambula obulungi.
Owek. Waggwa yeebazizza abazadde abeerekereza nebaweerera abaana era n’okubamanyisa ku buwangwa bwabwe kuba ayagala okumma eggwanga okulaakulana alimma byanjigiriza.
Abasabye okwettanira enteekateeka za Buganda nga bbasale, ebittavvu ebitereka ensimbi, emyoleso, okulima emmwaanyi, amalwaliro n’ebirala basobole okuyambibwa kuba emikisa gino Nnyinimu aziteerawo bantu be bakyuuse embeera zaabwe beegobeko obwavu.
Ye Minisita wa Gavumenti ez’Ebitundu, Owek. Joseph Kawuki asabye ababadde bavvoola Obwakabaka mu butamanya beetonde era beekube mukifuba era akuutidde abantu ebiva embuga babiggye ku mikutu emitongole era beewale okusaasaanya n’okwongerayo ebitali bituufu.
Bbo abaami baamagombolola nga bakulembeddwamu Hajj Hakim Kayiza boogede kukusomozebwa kweekiba ttaka mu Buwekula nga abantu basula kutebuukye naasaba Obwakabaka okuyingira mu nsonga eno.
Ye Omugabe Luweekula Sempijja Andrew yeebazizza Obwakabaka olw’okutuusa enteekateeka ku bantu nga zino zibayambye okusobola okwegobako obwavu n’okwekulaakulanya.
Amaggombolola agakiise embugaokuva e e Buwekula kubaddeko Mumyuka Bageza, Musaale Kiyuni, Ssaabaddu Butologo, Ssaabawaali Maddudu, Mutuba I Kitenga, Ssaabagabo Kasambya awamu n’assomero ate Kyaddondo wavuddeyo Ssaabagabo Lufuka.