Bya Ronald Mukasa
Mmengo – Kyaddondo
Nga twetegekera amatikkira ga Ssaabasajja Kabaka Ronald Muwenda Mutebi II aga 31, ebitongole n’abantu abenjawulo batandise okuleetera Beene ebirabo ng’akabonero ak’omuyozaayoza okutuuka ku lunaku luno.
Olwa leero bannakisinde ki Patriotic League of Uganda (PLU), basitukiddemu nebakiika embuga n’Ente kkumi nebasaba Beene asiime gafuuke Amakula.
Bano bakulembeddwamu amyuka Ssentebe wa PLU mu ggwanga, Michael Nuwagira Kaguta Toyota muto wa Pulezidenti Museveni.
Bw’abadde abatikkula Amakula gano, Minisita w’Obuwangwa Ennono n’Obulambuzi, Oweek Dr. Anthony Wamala kulwa Kamalabyonna akunze bannabyabufuzi bulijjo okubeera abaweereza b’abantu mu kifo ky’okubanyigiriza.
Bano Owek. Wamala abeebazizza olw’okugatta abantu b’eggwanga awatali kwawula mu ndowooza zaabwe mu by’obufuzi n’enzikiriza nategeeza nga kino bwe kikwataganira ddala n’ekigendererwa kya Nnyinimu eky’okunyweza obumu mu bantu be.
Owek. Wamala era abeebazizza olw’okukolagana obulungi n’obwakabaka, bwatyo naabasaba okwongera okubeera a bawulize eri Nnamulondo.
Minisita w’ Amawulire okukunga era omwogezi w’Obwakabaka, Owek Israel Kazibwe Kitooke yeebazizza bannakisinde kino olw’okubeera abawulize eri obwakabaka era naabakubiriza okwettanira enteekateeka z’obwakabaka.
Amyuka Ssentebe wa PLU mu ggwanga, Nuwagira Michael Toyota Kaguta yeebazizza obwakabaka olw’okubaniriza entakera buli lwebajja embuga era bayozaayozezza Beene olw’okutuuka ku matikkira ge ag’omulundi ogwa 31.
Ye minisita omubeezi ow’ekikula ky’Abantu mu gavumenti ya wakati, Hon. Balaam Barugahara yebazizza katonda olw’okusobozesa Nnyinimu okudda ku butaka nga Mulamu nekiyamba okussa ekkomo ku bibadde bibungeesebwa nti yawambibwa.
Ensisinkano eno yetabiddwamu abakulembeze abenjawulo okuli ababaka ba Paalamenti, nga Hon Daudi Kabanda ssaabawandiisi w’ekisinde kino, Omubaka Twaha Kagabo munnakisinde, Hon Grania Hope Nakazibwe, Hon Grace Baryeku nabalala bangi.