Bya Ssemakula John
Lubaga – Kyaddondo
Katikkiro Charles Peter Mayiga atendereza obuvumu Abaami bakabaka ku mitendera egyenjawulo bweboleseza wakati nga abalabe ba Buganda bagezaako okutyoboola Nnamulondo nga bwebeekwese mu kubanja Kabaka naabasaba okusigla ku mulamwa.
Bino Kamalabyonna Mayiga abyogeredde ku wooteeri ya Pope Paul mu Ndeeba bw’abadde aggulawo olusirika lw’Abaami b’Amasaza ku Lwokubiri.
Ow’omumbuga abakulu bano abakubirizza obutasuula bwesigwa Ssaabasajja Kabaka bweyabateekamu era babukozese okukumaakuma abantu be n’ekigendererwa eky’okunyweza obuweereza bwabwe mu bantu ba Beene nga tebeerabidde kunnyikiza nteekateeka za Bwakabaka ez’enkulaakulana.
Owek. Mayiga asabye Abaami b’ Amasaza okukwasizaako abaamaggombolola nga bawanirira emirimu gyabwe nga bayita mu kubawabula n’okulungamya kulw’ obulungi bw’enzirukanya y’emirimu gy’Obwakabaka.
Bano abakuutidde okwefaako ku by’obulamu nga beekebeza endwadde, wamu n’okukuutira be bakulembera okutwala ensonga z’ebyobulamu ng’ekintu ekikulu.
Kamalabyona asaasidde Obuganda olw’okuviibwako omwami wa Kabaka abadde omulammulirako essaza Bugerere, Mugerere James Ssempiga namwebaza olw’okuwereeza obwakabaka bwe wakati mukwagala.
Ono ayanirizza Abaami b’Amasaza abajja nabajjukiza obutasuula bwesigwa Ssaabasajja Kabaka bweyabasaamu era beewale okutunda eby’obugagga bya Kabaka.
Kamalabyona ateegezezza nti obukulembeze obubi busanyaawo amawanga nabakakasa nti Abaami bakabaka babeera mpagi luwaga mukuzZaawo obwakabaka nga bwebwali nga omuzungu tanabutaagulataagula.
Mukuumaddammula ategezeza nti bulijjo omukulembeze omulungi anoonya okumanya n’okuyiga era baami b’amasaza okwetanira ensirika nga zino basobole okufuna ebirowoozo eby’omugundu ebinatuusa Buganda kuntikko.
Minisita wa Gavumenti ezebitundu mu Buganda, Owek Joseph Kawuki ategezezza nti olusirika luno lugendereddwamu okumanyisa Abaami b’Amasaza n’abamyuka babwe obuvunaanyizibwa bwabwe.
Ssentebe w’olukiiko lw’ Abaami b’Amasaza Pookino Jude Muleke ategeezezza nti olusirika luno lwakubayamba nga Abaami b’Amasaza okumanya obuvunaanyizibwa bwabwe mu mukuwereeza abantu b’Omutanda.
Kinajjukirwa nti olusirika luno lwakuggalwawo omuwanika w’Obwakabaka era amyuka Katikkiro ow’okubiri, Owek Robert Waggwa Nsibirwa olunaku olw’enkya.