Bya Francis Ndugwa
Entebbe – Busiro
Nnyinimu Ssaabasajja Kabaka Ronald Muwenda Mutebi akomyewo ku butaka okuva e Namibia gyamaze akabanga nga awummuddemu wamu n’okulaba abasawo abakugu ku nsonga z’obulamu bwe.
Omutanda yatuuse ku Ssande mu kiro ekikeesezza olunaku lwa Mmande Omutanda atuuse ku ssaawa zibadde mwenda n’eddakiika 40 ez’ekiro ekikeesezza monday nga 22 July,2024.
Nnyinimu ayaniriziddwa Katikkiro Charles Peter Mayiga, Nnaabagereka Sylvia Nagginda, Nnaalinnya Lubuga Agnes Nabaloga, Abaana b’Engoma okuli, Omulangira Crispin Jjunju Kiweewa, ne Nnaalinnya Victoria Nkinzi.
Katikkiro mu kwogerako eri ab’amawulire n’abantu ba Buganda abeebazizza okubeera abagumiikiriza ku lw’okusoosowaza obulamu bwa Kabaka n’asobola okujanjabwa mu mirembe, nebatamalira budde ku boogezi b’e bigambo ebitaliiko mutwe na Magulu.
Omulangira Chrispin Junju Kiweewa mu bubakabwe ne ku lw’Abennyumba ya Ssaabasajja, yeebazizza Gavumenti ya Uganda, ne ye Namibia, olw’obuwagizi bweziwadde Maasomooji, abasawo ba Ssaabasajja ab’e Switzerland, Germany ne Namibia, saako abaweereza abalabiridde Empologoma ya Buganda yonna gy’ebadde ejjanjabirwa.
Omulangira Junju agambye nti Ssaabasajja yeyasiima awummulireko mu Namibia, nti kubanga embeera yaayo ewummuza ate erimu emikisa, kyokka naavumirira bonna ababadde emabega w’Okuvvoola Nnamulondo.
Omutanda wakomeddewo nga Obuganda buli mukwetala nga bwetegekera Amatikkira ga Kabaka ag’omulundi ogwa 31 bukya atuuzibwa ku Nnamulondo akulembere abantu be.