Bya Ronald Mukasa
Mmengo – Kyaddondo
Katikkiro Charles Peter Mayiga asisinkanye ab’ekibiina ekitaba abasogozi b’omwenge ki Uganda Alcoholic Industrial Association nategeeza nti omwenge mukulu nnyo mu nnono za Buganda naye gusobola okubeera ogw’obulabe singa omuntu aguyitiriza.
Ensisinkano eno eyindidde mu Bulange e Mmengo ku Lwokusatu nakakasa nga enkozesa y’omwenge embi bweri emu ku nsonga esinze okukuumira abantu mu bwavu.
“Omwenge gwa dda nnyo wano mu Buganda era Bajjajjaffe baagukolanga okuva mu bitooke n’embidde kyokka abantu basaana okuba n’ekkomo ku ngeri gye bagukozesaamu, nga banywa ekisaanidde, obutataamirukuka mu biseera byakukola, n’okwewala omwenge ogutatuukana na mutindo,” Katikkiro Mayiga bw’annyonnyodde.
Kamalabyonna Mayiga ategeezezza nti abantu balina okumanya nti okunywa omwenge tekimalawo bizibu ng’abasinga bwe bakitwala bwatyo naabasaba okugukozesa mu bwegendereza.
Ono agasseeko nti omuntu owoobuvunaanyizibwa talina kunywa mwenge kugangayira nafuuka ekisekererwa, wabula kikulu omuntu okunywamu mu kiseera ekyokusanyuka ng’ali ne banne.
Owek. Mayiga alabudde ku mwenge gw’omubuveera gwagambye nti gwa bulabe, teguliiko alamula, ate tegulina layisinsi, wabo waasabidde abantu bagwewale bwebaba bakyayagala okubeera abalamu nga kuno abamu bwebagattako okunywa omwenge oguyitiridde kyongedde okusaasaanya Mukenenya.
Ssentebe w’ekibiina kino Jackie Tuhakanizibwa Kwesiga ategeezezza nti ekigendererwa ky’ ekibiina kyabwe, omuli okunyweza omutindo gw’omulimu gwabwe, okwongera okutondawo emirimu, okulwanyisa enkozesa yomwenge enkyamu saako nokuwagira enkulakulana y’eggwanga nga bayita mukuwa emisolo eri gavumenti eyawakati,
Tahakanizibwa era asabye Obwakabaka bubateereyo eddoboozi ku mateeka agaleetebwa ku byokunywa,gagamba nti gabanyigiriza bbo nga abasogozi b’ebyokunywa bino.
Ensisinkano eno yetabiddwamu minisita w’Obulimi obulunzi obuvubi n’obwegassi oweek Hajji Amis Kakomo, Minisita w’ Amawulire n’Okukunga Abantu era Omwogezi w’Obwakabaka, Owek. Israel kazibwe Kitooke n’ abakungu abalala.