Bya Ronald Mukasa
Lubiri – Mmengo
Kamalabyonna Charles Peter Mayiga agaddewo Ttabamiruka w’ Abakyala owa 2024, naakubiriza abakyala okubeera abayiiya, abanyikivu abeerufu era bakole n’okwagala bwebaba baagala okuganyulwa mu byebakola
Obubaka buno Kamalabyonna Mayiga abuweeredde mu Lubiri e Mmengo ku Lwokusatu mu Ttabamiruka w’Abakyala ba Buganda ow’omulundi ogw’ekkumi.
Owek. Mayiga agambye nti omulamwa gw’omwaka guno gwoleka bulungi obusobozi abakyala bwebalina mu nkulakulana eyanamaddala eya Buganda ne Uganda.
Mukuumaddamula era abakunze okugatta amaanyi beetabe butereevu mu lutalo lw’okuzza Buganda ku ntikko nga bamalirira mubyebakola ate nga tebanyoma.
Mayiga asinzidde wano naasaba abaami okuwa abakyala emisiri gy’emwannyi egyabwe ku bwabwe basobole okwekulaakulanya, nakutiira abakyala okwenyigira mu mirimu egyenjawulo nga eby’engiriza, obusuubuzi n’emirala okusobola okukyusa embeera zabwe nga balabira ku bannabwe abayitimuse mu mirimu egyo.
“Bulijjo bw’oba oyagala okubaako ky’okola gumira ku mulala akolera mu mbeera mw’oli so ssi kunaayiza beebunayira”. Owek. Mayiga bw’annyonnyodde.
Ono yeebazizza Minisita wa Bulungibwansi, Obutonde Bw’ensi n’Ekikula ky’ Abantu n’Amazzi, Owek Hajjati Mariam Mayanja Nkalubo n’akakiiko akateesiteesi olw’okutegeka Ttabamiruka ono nasaba wateekebwewo ne Ttabamiruka w’ Abaami okusobola okuteekateeka omwana omulenzi.
Omukolo guno gwetabiddwako abakulembeze mu biti ebyenjawulo, okuli minisita wa Tekinologiya mu Gavumenti eyawakati Owek. Joyce Nabbossa Ssebugwawo, ababaka abakyala mu Palamenti, Minisita Hajji Amis Kakomo, Minisita w’ Amawulire, n’Okukunga Abantu Owek. Israel Kazibwe Kitooke, Minisita Noah Kiyimba n’abakungu abalala bangi.