Bya Francis Ndugwa
Lubiri – Mmengo
Nnamungi w’omuntu abasobye mu mitwalo kkumi akedde kweyiwa mu Lubiri lwa Ssaabasajja Kabaka Ronald Muwenda Mutebi II e Mmengo okwetaba mu misinde egikulembera amazaalibwa ga Kabaka ag’omwaka 2024.
Guno gubadde mulundi gwa 11 ng’emisinde gino giddukiddwa era olwaleero gibadde wansi w’omulamwa ogugamba nti, “Abaami ffe basaale okulwanyisa mukenenya, tutaase” ng’era abaddusi basimbuddwa Nnaalinnya Lubuga, Agnes Nabaloga.
Abaddusi basoose nakugolola binywa nga bano babadde bakulembeddwamu abakugu era oluvannyuma Nnaalinnya natandika okubasimbula.
Bw’abadde atuusa obubaka bwa Beene, Nnaalinnya Nabaloga ategeezezza nti obungi bw’abantu bano abajjumbidde emisinde baleese Omutanda akamwenyumwenyu kuba kiraze nti bajjumbidde ensonga enkulu ey’okwetaasa ku Mukenenya.
Beene era akubirizza abantu be okwekuuma naalagira ababeera bakwatiddwa akawuka okwejjanjabisa nga obudde bukyali.
Kamalabyonna Charles Peter Mayiga yeebazizza abantu abeetabye mu misinde gino naabasaba okutwala ebiragiro bya Kabaka nga bikulu okusobola okutwala Buganda ku ntikko.
Kulwa kampuni ya Airtel abavujjirizi abakulu ab’emisinde gino, Ssenkulu wa Airtel, Manoj Murali, yeebazizza bannayuganda olw’okujja mu bungi nebawagira enteekateeka eno egendereddwamu okutumbula eby’obulamu.
Emisinde gino gijjubiddwa abeebitiibwa ab’enjawulo omubadde Omulangira Richard Ssemakookiro, Omumbejja Katrina Mirembe Ssangalyambogo, baminisita mu kkabineeti ya Kabaka, Abataka abakulu ab’Obusolya, Ababaka ba Palamenti wamu n’abakungu abalala.