Mu Ssaza Kabula empaka z’Omupiira gw’Eggombolola zikomekerezeddwa.Ggombolola Musaale Mpumudde y’ewangudde ekikopo kya Lumaama Cup mu balenzi bw’ekubye Ssaabaddu Lyantonde ggoolo 4:3 mu kusimulagana ‘penalties’ oluvannyuma lw’omupiira okuggwa amaliri ga 1:1 mu ddakiika 90.
Eggombolola Ssaabawaali Kaliiro y’ewangudde ekikopo kya #LumaamaCup mu mupiira ogw’ebigere ogw’abawala, ekubye Musaale Mpumudde ggoolo 3:2 mu kusimulagana ‘penalties’ nga mu ddakiika 90 gwawedde 0:0.
Omwami w’Essaza Oweek. David Luyimbaazi yeebaziza Kabaka olw’enteekateeka eno, era agamba nti abadde n’abakugu ku Kisaawe mu mipiira gyoñna okulaba nga balondobayo abaana abanaazannyira Essaza mu Kabaka mu mpaka z’Omupiira gw’Amasaza ez’engedde.
Mw. Kavuma Derrick, Amyuka Ssentebe w’Abavubuka mu Buganda ategeezeza nti ebibala okuva mu biruubirirwa ebyateesaawo Empaka zino bitandike okulabwako. Anokoddeyo obujjumbize bw’abawagizi, ebitone ebizuuliddwa, okunyumirwa ate n’okubunyisa kaweefube w’okulwanyisa Mukenenya. Wano wasinzidde n’akowoola abavujjirizi okwegatta ku mpaka zino kubanga ziweera ddala akatale eri ebintu bingi ddala.
Empaka zino ezeetabiddwamu Eggombolola 4; Musaale Mpumudde, Ssaabaddu Lyantonde, Ssaabawaali Kaliiro ne Mumyuka Kasagama zikomekkerezeddwa ku Kisaawe kya Baakijjulula era bannaddiini ab’enjawulo ne bannabyafuzi, ne Bannakabula bangi ababaddewo okuwagira abavubuka baabwe