Bya Stephen Kulubasi
Mengo – Kyadondo
Katikkiro Charles Peter Mayiga asabye abantu okufuba okugenda mu mwoleso gwa ‘CBS Pewosa Nsindika Njake’ oguyindira mu Lubiri lwa Kabaka e Mengo babeeko n’ebintu byebayiga ate bagaziye obuyiiya n’okumanya kwabwe. Katikkiro era ategeezezza nti ng’oggyeko okusitula obuyiiya mu ggwanga, omwoleso guno guyamba okugatta abaludde mu mirimu n’abo abaakagitandika nebawang’ana amagezi ku by’obusuubuzi. Katikkiro era akubirizza bantu okugula ebintu ebikolebwa kuno kubanga bya mutindo ate biyamba ne gavumenti okufuna omusolo. Okwogera bino, Owomumbuga abadde mu Lubiri lwa Beene e Mengo bwabadde aggulawo omwoleso guno mu butongole.
Mu miganyulo emirala egiri mu mwoleso guno Katikkiro gyanokoddeyo mulimu, okwoleka obuyiiya, nga mu kino abantu bavudde ku kufumbisa enku nga kati bakozesa masannyalaze agaggyibwa mu maanyi g’enjuba n’omuliro oguva mu nakavundira, okufuna abaguzi kubanga abantu boolesa byebakola olwo nabaguzi nebabyeyunira n’ebirala bingi. Kamalabyonna atenderezza ebintu aboolesi byebamulambuzza nagamba nti bimuwadde essuubi ddene nti eby’amakolero by’eggwanga bikula.
Katikkiro asinzidde wano neyeebaza leediyo ya Kabaka eya CBS olw’okussa ebiragiro bya Ssaabasajja Kabaka mu nkola omuli eky’okuggya abantu mu bwavu kubanga ebibiina bya Pewosa bikoze kinene nnyo ku nsonga eno era n’abasaba okuddingana kaweefube ono n’abantu berwaneko bakyuuse embeera z’obulamu bwabwe. Mu ngeri yeemu, Mukuumaddamula yebazizza aba Pewosa olw’okuzzaawo enkola ya “Okwegatta ge maanyi”, n’abakubiriza okukolera awamu bagaggawale.
Mu boolesezza mubaddemu n’ebitongole eby’enjawulo era Owomubuga bino abisabye obutateekawo bukwakkulizo buyitiridde obuyinza okulemesa abantu okukola nga mu bino anokoddeyo ekitongole ekiwooza ky’omusolo ekya Uganda Revenue Authority ky’asabye obutateekawo mbeera ereetera basuubuzi kwetamwa n’okwewala omusolo.
Omukolo guno gwetabiddwako Baminisita b’Obwakabaka okuli ow’ebyenjigiriza, eby’obulamu n’enkulaakulana y’abantu, Owek. Cotilda Nakate Kikomeko, ow’obuwangwa, ennono, ebyokwerinda, Embiri n’Amasiro Owek. Anthony Wamala n’ow’amawulire, okukunga era Omwogezi Owek. Israel Kazibwe Kitooke.