Bya Ronald Mukasa
Mmengo – Kyaddondo
Ebyokwerinda binywezeddwa ku kkooti ya Mwanga II e Mmengo mu Kampala nga abateeberezebwa okutta Omutaka Lwomwa omubuze Daniel Bbosa Kakeedo baleetebwa mu kkooti enkya yaleero.
Bano kuliko; Luggya Noah ow’emyaka 21 omutuuze we Kabanga mu Ttawuni Kkanso ye Mpigi, Nakiguli Harriet ow’emyaka 41 omutuuze wa Nkere Zzooni Divizoni ye Kawempe, Nakabaale Joseph ow’emyaka 47 nga musiizi wa langi omutuuze we Gala Mpigi Ttawuni Kkanso, Naluwenda Milly ow’emyaka 46 omuwandiisi mu kkooti ya Kisekwa era omutuuze w’e Lungujja Kitunzi mu Division ye Rubaga ne Mayanja Ezra ow’emyaka 44 omutuuze wa Kiganda Zzooni mu Divizoni ye Kawempe nga mubazzi.
Bano basimbiddwa mu maaso g’omulamuzi Adams Byaruhanga nebasomerwa omusango ogw’okwekobaana okutemula omutaka omubuze Daniel Bbosa Lwomwa mu bukambwe nga 25 omwezi ogwa February e Lungujja mu Kampala.
Bano wabula tebakkiriziddwa kubaako kyeboogera era omulamuzi n’abategeeza nga kkooti eno bwetalina buyinza kuwulira musango guno.
Omulamuzi bano abategeezezza nga bwebalina eddembe okusaba okweyimirirwa mukooti enkulu.
Oludda oluwaabi lutegeezezza kkooti eno ng’okunoonyereza ku musango guno bwegukyagenda mu maaso era omulamuzi Adams Byaruhanga nalagira bano bazzibwe ku alimanda e Luzira okutuusa nga 11 April omwaka guno lwebanadda mu kkooti.