Bya Francis Ndugwa
Kiteezi – Gayaza
Nnyinimu Ssaabasajja Kabaka Ronald Muwenda Mutebi II, asaasidde ab’enju y’omugenzi Benedicto Kakeeto Kasekende olw’okuviibwaako nnyabwe Angella Namusoke Kasekende maama wa Owek. Martin Sseremba Kasekende era maama w’eyaliko Omumyuka wa Gavana wa Bbanka enkulu, Dr. Luis Kasekende olw’okukuza obulungi abaana abagasizza eggwanga mu ngeri ez’enjawulo
Obubaka bw’okusaasira buno, Ssaabasajja abutisse Katikkiro Charles Peter Mayiga abusomedde abakungubazi mu kuziika omugenzi okubadde ku kyalo Kiteezi mu mu Ggombolola ye Kawempe mu disitulikiti ye Wakiso ku Lwokusatu.
Mukwogerakwe kamalabyona Charles Peter Mayiga asoose kusoma bubaka bwa lukoma nantawetwa obusaasira ebenju yomugenzi era naatendereza omugenzi olw’okugunjula obulungi abaana be n’okubaagazisa ensi yabwe.
Ku lulwe Katikkiro ajjukiza abazadde okuteekateeka abaana babwe nga babasomesa, okubajjanjaba n’okubassaamu empisa z’obuntu bulamu kibayambe okubeera ab’omugaso.
Owek. Mayiga asinzidde wano naatongoza ekitabo ekyawandiikibwa omugenzi Benedicto Kakeeto Kasekende, taata wa owek Martin Sseremba Kasekende n’akubiriza abantu okusoma ebitabo kwossa okuwandiika okusobola okukuuma ebyafaayo.
Omukulu w’ekika ky’Omutima, Namugera Kakeeto asabye ab’enju ya Kasekende okutandikawo ensawo eyenjawulo egenderera okusomesa abaana abataliiko mwasirizi nga kabonero akasiima Katonda olw’okusuumuusa amaka gabwe era kiyambe n’okukuuma omukululo gwabwe.
Kulw ‘ abaana Dr Louis Kasekende n’ Owek. Martin Sseremba Kasekende beebazizza abantu abababereddewo nebatendereza nyabwe olw’okubateekateeka obulungi mu mpisa n’eddiini.
Omukolo guno gwetabiddwako baminisita n’abeebitibwa okuva e Mmengo omubadde Minisita w’Ebyettaka, Daudi Mpangan’abalala wamu ne bannabyabufuzi omubadde; omubaka wa Kyadondo East ,Muwada Nkunyingi, Mmeeya w’ eggombolola ye Lubaga Mbeeraze Zacky Mawula nabakungubazi mu biti eby’enjawulo.