Bya Stephen Kulubasi – Lubaga
Katikkiro Charles Peter Mayiga akuutidde abavubuka mu Buganda okwettanira obufumbo ng’emu ku mpagi enayambako okutuusa Buganda ku ntikko. Owek. Charles Peter Mayiga agambye nti omuvubuka bwafuna obufumbo obutukuvu emikisa gye gyeyerula n’abantu ne batandika okumwesiga kubanga abeera afuuse wabuvunaanyizibwa. Obubaka buno Ow’omumbuga abuweeredde ku Lutikko e Lubaga ku mukolo gw’okugatta Omulangira Mutebi Ben n’Omuzaana Stella Nabukenya mu bufumbo obutukuvu.
Kamalabyona asomoozezza abavubuka okubeera abamalirivu bwebabaako n’ensonga yonna gyebaagala okuggusa mu ggwanga bwatyo naasaba abagole Ben Mutebi ne Stella Nabukenya okubeere ab’emikwano okusobola okuwangaaza obufumbo bwabwe.
Rev. Fr. Remmigious Sserugga yakulembedde Mmisa y’okugatta abagole bano. Bwabadde ayigiriza, Rev.Sserugga asabye bannayuganda okutwala amaka ng’ekintu ekikulu nnyo era nategeeza nti gateekwa okubeera n’omusingi omunywevu ogusosoowaza Katonda n’okwagala.
Mmisa y’okugatta Omulangira Ben Mutebi n’Omuzaana we Nabukenya mu bufumbo obutukuvu yeetabiddwako abakkiriza mu bitti eby’enjawulo okubadde Minisita wa gavumenti ez’ebitundu n’entambula za Kabaka Owek. Joseph Kawuki, Omusirikale wa Ppaapa Omuk. Dr. Kasozi Mulindwa n’abakkiriza abalala bangi.