Bya Ssemakula John
Bulange -Mmengo
Nnyinimu Ssaabasajja Kabaka asiimye okulabikako eri Obuganda ku Lwomukaaga luno bwanaaba aggulawo empaka z’ekikopo ky’omupiira gw’Amasaza ogw’omwaka 2023 mu kisaawe e Wankulukuku.
Kino kibikuddwa Katikkiro Charles Peter Mayiga bw’abadde atongozza empaka zino mu bimuli bya Bulange ku Lwokusatu nasaba abantu okujja mu bungi babugirize Empologoma.
“Ssaabasajja Kabaka gy’ali mu Lubiri era alamula Obuganda. Era asiimye okulabikako eri Obuganda ku Lwomukaaga luno ku Lwomukaaga luno nga atongoza empaka z’omwaka guno,” Owek. Mayiga bw’ategeezezza.
Owek. Mayiga asinzidde wano nawa abali mu nteekateeka y’ekikopo ky’Amasaza amagezi okukuuma empisa n’obuntubulamu okusobola okukuuma ekitiibwa ky’empaka zino.
Owomumbuga awadde obweyamo eri abavujjirizi nti Buganda yakwongera okukwatagana nabo naabebaza olwokutegeera Ssaabasajja n’Obuganda.
Katikkiro yebazizza abavujjirizi olw’okutegeera obuzito bwa Ssaabasajja Kabaka, n’agamba nti obwakabaka bwebusinga okutegeerwa mu buvanjuba ne masekkati ga Africa, kino kijja kubayamba okulanga ebyamaguzi byabwe eri abo abeegasse ku Bwakabaka.
Minisita w’Ebyemizannyo, Abavubuka n’Okwewummuza, Owek. Henry Kiberu Ssekabembe agamba nti essira balitadde ku kubangula abakulembeze ba ttiimu zino okuyamba omupiira ogw’okwongera okukula.
Ssentebe w’olukiiko olutegeka empaka zino, Sulaiman Ssejjengo annyonnyodde nti baliko ennoongosereza zebakoze mu mateeka gempaka zino okwongera okugulongoosa era waliwo ebirungo ebyongeddwamu okusitula omutindo.
Empaka z’omwaka guno ziggulawo n’omupiira wakati w’ abawanguzi b’omwaka oguwedde aba Busiro bagenda kuba bameggana ne Mawokota mu kisaawe e Wankulukuku.
Abavujirizi b’omulundi guno ogwe 19 bakulembeddwamu Airtel, Kansai Plascon, Centenary Bank, BBS Terefayina, CBS n’abalala era nga bonna wamu bawaddeyo ensimbi ezisoba mu 400 okusobola okutambuza ekikopo kino.