Bya Ssemakula
Amerika
Bannayuganda abawangaalira mu Amerika mu kibuga Boston bajjukidde abajulizi ba Uganda abattibwa olw’eddiini era wano Katikkiro Mayiga abasabye baleme kugendera ku byafaayo ebitali binnyonnyole ku nsonga ya Ssekabaka Mwanga awamu n’okuttibwa kw’Abajulizi.
Owomumbuga agamba nti ensi erina okukimanya nti Ssekabaka Mwanga yayagala kutaasa nsi ye Buganda bweba si Uganda. Ono annyonnyodde nti abantu bavvuunula bubi ekikolwa kya Ssekabaka Basammulakkere Mwanga okutta abajulizi wabula kwali kukwasisa mateeka so si kulemesa ddini kujja mu Uganda.
Bino ow’omumbuga abyogeredde mu Kitambiro kya mmisa eyimbuddwa Ssaabasumba w’essaza ekkulu erye Kampala, Paul Semogerere ku Saint Mary’s Church e Waltham Boston.
Katikkiro akozeseza omukisa guno okuvumirira abakungu mu gavumenti abagenda mu eklezia nekkanisa kyokka nga byebakola bikontana n’enjigiriza yeddiini ze bakkiririzaamu.
Owek. Mayiga abantu abasabye okutwala eky’okulabirako ky’abajulizi bamalirire mwebyo byebabeera basazeewo okukola awatali kutya bisomoozo.
Ye Omutambizi omukulu era Ssaabasumba w’Essaza Ekkulu Kampala, Paul Ssemogerere yeebazizza abantu era nabasaba bayimuse okukkiriza kwabwe era batwale ekikolwa ky’abajulizi ng’ eky’okulabirako.
Wabaddewo okusiima abantu abo abaliko byebakoledde bannayuganda abali ku mawanga naddala Boston.
Omukolo guno gwetabiddwako Omulangira David Kintu Wasajja baminisita nabakungu okuva mu Buganda.