Bya Ssemakula John
Botswana
Bannayuganda abawangaalira mu ggwanga lya Botswana basabye Nnyinimu Ssaabasajja Kabaka Ronald Muwenda Mutebi II asiime abawe essaza basobole okwekumaakuma obulungi n’okunyweza obumu.
Bano okusaba kuno bakukoze basisinkanye omwami wa Kabaka atwala essaza Buddu, Ppookino Jude Muleke mu kibuga Gaborone eggulo ku Ssande.
Bano bagamba nti wadde bakyali batono, balowoozebweko okubafuula essaza lya Kabaka, kibayambe okwekumaakuma nga bayita mu mukulembeze Kabaka gwanaabawa okusobola okwekulaakulanya.
Abantu bano bagamba nti basigalidde nnyo nga oluusi tebamanya ngeri gyebasobola kwegatta ku nteekateeka nga ey’okuna ennyumba mu Mirembe Villas e Kigo awamu ne Ssentema, okwekulaakulanya mu CBS PEWOSA n’okugula emigabo mu kkampuni za Buganda awamu n’enteekateeka endala.
Bano beebazizza Nnyinimu Ssabasajja Kabaka okubalowoozaako n’abasindikira ababaka, era nebawera nga bwebatasigadde kyekimu, kuba gwe mulundi ogusoose okufuna abagenyi abatongole okuva mu Bwakabaka bwa Buganda.
Mu kwogera kwe Ppookino Jude Muleke abasabye okwongera okunyweza obumu era bakole nnyo okwekulaakulanya olwo Buganda ne Uganda lwebijja okulaakulana.