Bya Ssemakula John
Amerika
Katikkiro Charles Peter Mayiga awadde bannayuganda abawangaalira ebunaayira amagezi okufisangawo akasente basobole okukasiga ku butaka nga bwekiri ku bannansi ba Ethiopia ne Somalia.
Bino abyogeredde ku Citrus Height Community Centre mu Sacramento mu kutuuza abaami b’essaza lye California Nevada eriri mu mambuka ga San Francisco mu America gyamaze wiiki nnamba ku bugenyi obutongole okuva mu Bwabakabaka.
Ow’omumbuga agamba nti kino basobola okukikola nga beekolamu ekibiina (SACCO) kyokka baleme kulinda kulindirizza nnyo .
Owomumbuga ategeezezza nti nebwebatandika nga batono kubanga si nti buli omu aba alaba ekirungi ekikirimu mbagirawo naye kigenda ku bayamba nnyo ng’abantu ate n’okuyamba abo bebaleka okwaboobwe.
Abaami abatuuziddwa kuliko Owek. Patrick Nalikka Ssendegeya n’omumyuka we Dr. Paul Kiruuta awamu n’olukiiko lwebagenda okukola nalwo wabula omu ku baami bano tasobodde kubaawo ku mukolo guno olw’emirimu gyabadde yagenzeeko.
Omumyuka Dr. Kiruuta yeebazizza omugenzi Dorothy Mugerwa olw’okuweereza Kabaka obuteebalira kyokka nasaba abalondeddwa okunoonya abantu ba Kabaka yonna gyebali mu ggwanga lino okubakumaakuma.
Minisita omubeezi owa Gavumenti ez’ebitundu era avunaanyizibwa ku bantu abawangaalira ebweru wa Buganda ne Uganda, Owek. Joseph Kawuki abasabye okunyweza obumu kyokka babe basaale mu kuwagira enteekateeka za Buganda.
Era ku mukolo guno banna Rotary mu ttabi lya Antioch ababadde bakungiddwa Dr. Kiruuta kwebaweeredde Katikkiro Mayiga cceeke ya ddoola 7000 okuyambako ku nteekateeka y’okufunira abantu ba Kabaka amazzi amayonjo.
Pulezidenti wa kiraabu ya Antioch yategeezezza nti kikulu nnyo abantu okufuna amazzi amayonjo okusobola okugoba endwadde era yeyamye okusigala nga bakola kyebasobola okuyambako.