Bya Ssemakula John
Seattle – Amerika
Katikkiro Charles Peter Mayiga akikaatiriza nti wakusigala nga akolagana nabuli muntu awatali kufaayo ku langi za kibiina kye, eggwanga oba eddiini ye kasita abeera nga awa Ssaabasajja Kabaka ekitiibwa .
Okwogera bino, Owek. Mayiga abadde aggalawo olukungaana lwa Buganda Bumu North American Convention oluyindidde e Seattle mu Amerika ku ky’eggulo ekituumiddwa, ‘The Royal Dinner.’
Owomumbuga agamba nti alumbiddwa emirundi mingi naddala nga waliwo ensonga gyakwataganye ne bannaddiini, gavumenti eri mu buyinza okubaako byebakolera abantu naye amaloboozi gavaayo nga bamukolokota olw’okukolagana nabo.
Kamalabyonna agasseeko nti abantu nga bano tebajja kumuggya ku mulamwa kuba ensonga Buganda zekolako tezisosola muntu yenna.
Katikkiro Mayiga yeebazizza abantu abeetabye mu Buganda Bumu w’omulundi guno nalaga nti amuwadde ekifananyi ekirungi n’essuubi ku lugendo lw’okuzza Buganda ku ntikko.
Kulwa Owek. Robert Waggwa Nsibirwa, minisita avunaanyizibwa ku bantu ba Kabaka abali ebunaayira, Owek. Joseph Kawuki abeetabye mu lukung’aana luno abayitiddemu kwebyo Buganda byetuuseeko mu byenfuna neesobola okutumbula embeera z’abantu n’okubazimbira amayumba.
Bbo abeetabye mu lukungaana lw’omwaka guno omuli nabavudde mu masaza ge Bungereza bagamba nti enteekateeka ebadde nnungi ddala.
Olukungaana lwomwaka guno lwetabiddwamu, Super Supreme Mufti, Sheikh Muhammad Galabuzi n’abamu ku bamasheikh abe Kibuli, Minisita Wilson Mululi Mukasa, Omubaka wa Uganda mu America, abakulira ebitongole mu Bwakabaka n’Abaami b’amasaza okuva mu mawanga amalala.