Bya Ssemakula John
Bulange – Mmengo
Nnyinimu Ssaabasajja Kabaka Ronald Muwenda Mutebi II asiimye naakola enkyukakyuka mu baami be ku mitendera egy’enjawulo okusobola okunnyikiza entambuza y’emirimu.
Ekirangiriro kino kiteereddwa mu kiwandiiko ekifulumye ku Lwomukaaga nga kiteereddwako omukono gwa Katikkiro Charles Peter Mayiga era nga enkyukakyuka zino zitandikiddewo okukola.
Okusinziira ku kiwandiiko, Beene asiimye naalonda Kaggo omuggya Hajji Ahmed Matovu Magandaazi okudda mu bigere by’omugenzi Owek. Agnes Nakibirige Ssempa. Owek. Magandaazi aweereddwa abamyuka babiri okuli; Omw. Ronald Bakulumpagi n’ Omuky. Phiona Kalinda.
E Buluuli, Omuteregga asindiseeyo Omw. John Mary Ssebbaale okubeera omumyuka wa Kimbugwe.
Mu baami abalala abakoleddwamu enkyukakyuka mwemuli ab’amasaza g’ ebweru nga muno mulimu abamasaza awamu n’Abamyuka babwe era mukiti kino, Owek. Ssaalongo Godfrey Kibuuka yalondeddwa ng’omwami w’essaza lya United Kingdom nga aweereddwa abamyuka 5 okumuyambako.
Mu Ssaza lye Beene erya Eswatini oba Swaziland, Owek. Paul Mulindwa yalondeddwa ate Dr. Ssemugabi Bakyayita naweebwa essaza lya South Africa – Gauteng nafuna abamyuka 2 olwo South Africa – Cape Province neweebwa Owek. Dennis Lugoloobi.
Beene e Sweden ataddeyo musajja we Owek. Nelson Mugenyi, New Englanda, USA (Massechusetts, Hampshire, Rhode Island, Vermot ne Connecticut) nalikwasa Owek. Henry Matovu Ndawula olwo ate North East Coast Amerika etwala New York, New Jersey Delaware ne Pennyslavia litwaliddwa Owek. Wycliffe Lule Musoke era bwegutyo bwegubadde ku masaza amalala agasangibwa ebunaayira.
Amasaza agali ebweru wa Buganda naye munda mu ggwanga, Omutanda mu ssaza lya Ankole ne Kigezi ataddeyo Owek. Mutaasa Kafeero nga amyukibwa John Kalibbala ate Owek. Ssenkumba Joseph amyukibwe Kizito Ronald.
Nnyinimu era alonze abaami b’eggombolola abaggya okudda mu bifo byabo abaafa awamu n’abaami b’emiruka awamu n’Abatongole wonna mu Buganda nga bano balondebwa emyaka 2 egiyise.
Ccuucu asinzidde mu kiwandiiko kino n’ asiima abaami ku mitendera egy’enjawulo omuli abawummudde nabo abaava mu bulamu bw’ ensi eno olw’ obuweereza bwebakoze.
Ku lulwe Katikkiro Mayiga abaami abalondeddwa abasuubizza enkolagana ennungi nga batambulira mu buufu bwa Namunswa.
Enkalala nga bweziyimiridde
