Bya Ssemakula John
Bulange – Mmengo
Abakulira ttiimu z’omupiira z’Ebika bya Buganda awamu n’ebikonde basisinkanye olukiiko olutegesi lw’ empaka z’omwaka guno okulaba enteekateeka wezituuse.
Ensisinkano eno ebadde mu Bulange e Mmengo ku Mmande.
Sentebe w’olukiiko olutegesi, Katambala Hajji Sulaiman Magala, agamba baagadde okutambulira awamu n’abakulira ttiimu okusobozesa empaka zino okutambula obulungi.
Ye akulira omuzannyo gw’okubaka n’ebikonde, Sarah Nkonge Muwonge akubirizza ebika okuwandiisa ttiimu z’okubaka mu budde era bafube okujjumbira kiyambe omuzannyo guno okulaakulana.
Olukiiko luno era lwetabiddwamu sentebe w’olukiiko olutegeka empaka z’omupiira gw’amasaza Omuk. Sulaiman Sejjengo era ono akubiriza ttiimu zonna okugobelera amateeka agateekebwawo okuddukannya empaka zino.
Kinajjukirwa nti Empaka z’omwaka guno zigenda kuggulwawo ku Lwomukaaga luno mu Kisaawe e Wankulukuku ng’ Enkima ettunka n’ Engabi Ensamba era Nnyinimu Ronald Muwenda Mutebi II yasiimye okuziggulawo. Endiga y’erina ekikopo ky’omupiira gw’ebigere ate Engeye y’erina ekyokubaka.