Bya Nassolo Maria
Namayumba – Wakiso
Abazadde wonna mu ggwanga basabiddwa okuweerera abaana babwe era babawulize mu mpisa era n’obuwulize eri Nnamulondo kiyambe Buganda okudda ku ntikko.
Obubaka buno buvudde mu boogezi ab’enjawulo abeetabye ku mukolo gw’okujagulizaako Owek. Rashid Lukwago bw’abadde yeebaza Allah olw’okufuna ddiguli ey’okusatu (PHD) okuva e Makerere mu by’ennimi awamu n’okusonda ssente z’okuzimba essomero lye erya Inspire Nursery and Primary School.
Bw’abadde ayogerako eri abeetabye ku mukolo guno, Omulangira David Kintu Wasajja nga yeyabadde omugenyi omukulu yagambye nti kikulu nnyo okusomesa abaana ensangi zino.
“Abaana b’Enda ya Nakalaama bwetuba tuli bakuvuganya ku mirimu tusomese abaana kuba omuntu asomye talina kwegayirira. Buli mwana musimbireyo ekikolo ky’emmwaanyi, nkukakasa nti woolituukira okumusomesa mu siniya ojja kuba olina wotandikira,” Omulangira Wasajja bw’annyonnyodde.
Omulangira Wasajja yeebazizza Owek. Rashid Lukwago olw’okufaayo nasoma era namwebaza olw’ettofaali lyatadde ku nkulaakulana y’abavubuka.
Omumyuka Asooka owa Katikkiro, Owek. Prof. Hajji Twaha Kaawaase Kigongo asabye Lukwago okufaayo nasoma era namwebaza olw’okuweereza Obwakabaka awatali kwebalira.
Ye Katikkiro eyawummula Owek. John Baptist Walusimbi akuutidde Owek. Lukwago akole okunoonyereza ku nsonga y’olulimi naddala Oluganda okusobola okulutumbula.
Omukolo guno gwetabiddwako n’Omukubiriza w’Olukiiko lw’ Abataka ab’Obusolya, Nnamwama Augustine Kizito Mutumba ng’ono asabye omujaguza okusigala nga mwetowaze era namwebaza olw’emirimu gyakoledde Obwakabaka.
Omukolo guno gwatandise n’okulomba dduwa y’okwebaza nga yakulembeddwamu Supreme Mufti Sheikh Shaban Muhammad Galabuzi era asinzidde wano neyeebaza Obwakabaka okusomesa abaana nga bayita mu bitongole nga Kabaka Education Fund kuba baliko ettofaali eddene lyebatadde ku nkulaakulana.
Omujaguza Owek.Dr. Rashid Lukwago eyewangulidde ddiguli eyokusatu amaziga katono gamuyunguke bw’ajjukiddemu byayiseemu mukusoma kwe, neyeebaza nnyo abo bonna abamukwatiddeko mu misomo gye gyonna.
Omukolo guno gwetabiddwako ebikonge eby’enjawulo omubadde Owek. Mariam Mayanja Nkalubo, Prof. Badru Kateregga, Omuk. Josephine Nantege, Omubaka wa Busiro North Nsubuga Paul awamu n’abalala.
Omukolo gw’okusonda ensimbi okwongera okuzimba essomero lya Inspire Nursery and Primary School ng’obukadde bw’ensimbi 39,320,000 bwebusoondeddwa.