Bya Ssemakula John
Mende – Busiro
Omulangira Dr. Kassim Nakibinge Kakungulu asabye Obwakabaka bwa Buganda okwongera okukwasizaaji bannaalinya babukale mu mbiri n’embuga zabwe era bagunyirwe okuzikuuma.
Okusaba kuno, Omulangira Nakibinge akukoledde ku dduwa y’okujjukira Ssekabaka Nooh Kalema mu masiro e Mmende mu Busiro mu disitulikiti ye Wakiso.
“Amasiro mu Buganda, bannaalinya bebagafuga era bebagalinako obuvunaanyizibwa. Njagala okusaba Owek. Kaawaase ono atwale obubaka e Mmengo balagire bannaalinya batuule mu mbuga zabwe nga tebalina abatawaanya” Omulangira Nakibinge bw’ategeezezza.
Omulangira Nakibinge agamba nti waliwo abantu abeeyita Abalangira abalina omuze gw’okugenda mu mbuga zino nebakola ebitasaana awamu n’okwagala okutunda ettaka ly’embiri n’amasiro ag’enjawulo n’okutaataaganya bannaalinya.
Omulangira Kakungulu asabye Obwakabaka okuvaayo bukome ku bannaalinya abeemalidde mukutunda embuga zino kuba zigasa abantu bonna omuli abali nabaliddawo.
Ono yeebazizza Dr Abasi Kiyimba, aba Ssekabaka Nooh Kalema Foundation ne Ssekabaka Nooh Kalema Muslim Foundation olw’okutegeka omukolo guno emyaka gyonna nga basiima ebyo byeyakola okutumbula Obusiraamu.
Omulangira Nakibinge era yeenyamidde olw’abantu abalowooza nti ebyafaayo bino tebiriiyo nti era tewali muntu amujjukira nakakasa nti ono ye Ssekabaka yekka omusiraamu alina ‘Muslim Center’ ng’eno etwala amasomero awamu n’omuzikiti nga byonna biri mu myaka mingi ddala.
Omulangira era asinzidde wano nasaba abantu okukuuma ebyafaayo kiyambeko okuggyawo abantu abawandiika nokwogera ebint ebikyamu naddala ku Bwakabaka.
Ye Omumyuka Asooka owa Katikkiro, Owek. Prof. Twaha Kaawaase Kigongo naye akuutidde abantu okukuuma ebyafaayo awamu n’okunyweza obumu kiyambeko okukuuma n’okutaasa Nnamulondo.
Owek. Kaawaase asabye abantu okutunuulira ennyo ebyo ebitwala Buganda mumaaso okusinga ebireetetawo enjawukana nembeera endala.
Nnaalinya w’Amasiro gano, Mariam Luwedde alaze okutya olwa bannakigwanyizi abatuuka nokumugoba mu masiro gano olw’okwagala okutunda nokwonoona ennono yaago ngaberimbika mu kubeera Abalangira.
Kinajjukirwa nti Ssekabaka Nooh Kalema yali muzzukulu wa Ssekabaka Ssuuna I, ne Ssekabaka Muteesa I nga bano baali basaale okuleeta eddiini y’Obusiraamu mu Buganda.
Ono era mwemuva Omulangira Nooh Mbogo abamu kubajjukirwa okulwanirira n’okutumbula obusiraamu.
Omukolo guno gwetabiddwako abantu ab’enjawulo omuli Ssaabalangira Kayima, Omumyuka Asooka owa Katikkiro Prof. Twaha Kaawaase Kigongo awamu n’abantu abalala.