Bya Nassolo Maria
Kampala Mukadde – Kyaddondo
Abaami n’abatongole ba ssabasajja bakubiriziddwa okunyweza ensonga ssemasonga ettano,n’okutuukiriza obuvunanyizibwa bwabwe ng’abakulembeze.
Obubaka buno buweereddwa munnamateeka Lumunye Ronald Kasozi nga yakiikiridde Kaggo mu musomo gw’ okubangula Abaami n’ Abatongole ku buvunaanyizibwa bwebalina eri abantu ba Kabaka.
“Mbeebaza okujjumbira omusomo guno,okuwaayo Oluwalo embuga omwaka oguwedde,wamu n’okugaba omusaayi mubungi ddala,mwatuweesa ekitiibwa,” Munnamateeka Lumunye bwe yategeezezza olunaku lw’ eggulo.
Lumunye era yasabye abakulembeze bano okuddayo basomese banaabwe byebayize era balwanyise omuze gw’okutambuza amawulire amakyamu ku Bwakabaka.
“Bannamwe abatazze wano mubasomese byemuyize,era mulwanyise omuze gw’okutambuza amawulire amakyamu ku bwakabaka kubanga kino kizza Buganda e mabega”.
Ye akulira Abavubuka be Kyaddondo mu Bwakabaka, asabye Abaami n’ Abatongole ba Kabaka mu masaza amalala okujjumbira emisomo nga gino kuba gyakubayigiriza bingi ku ntambuza y’emirimu n’enkulaakulana.
Ye omwami w’embuga y’eggombolola masekkati era eyakuliddemu okuteekateeka omusomo guno, Kawuma Lule Henry abasuubizza okubakwasizaako nga batambuza emirimu gy’Obwakabaka n’okwongera okubaleetera abaseesa babasomese ebintu eby’enjawulo ebikwata ku buweereza.
Akulira abaseesa mu ssaza Kyaddondo, Ssaalongo Kalema asabye abakulembeze okufaayo okuyiga emirimu bwegitambula kuba lino lyerimu ku makubo agagenda okuzza Buganda ku ntikko.
Enteekateeka eno yakutambuzibwa mu masaza gonna e 18 era Abaami abeetabye mu musomo guno basuubizza okussa mu nkola ebibasomeseddwa wamu nokusomesa banaabwe abatasobodde kukiika.