Bya Ssemakula John
Makindye – Kyaddondo
Kkooti y’Amagye e Makindye eyimbudde omujaasi wa South Sudan ali ku ddaala lya ‘Lt. General’ William Mark Orobi bwemuggyeeko emisango gy’okusangibwa n’emmundu awamu n’amasasi ekikontana n’amateeka.
Omujaasi ono William Mark Orobi yasooka kulabikako mu maaso ga Ssentebe wa kkooti eno, Lt General Andrew Gutti nga August, 5th 2019 wadde emisango gyagizza 2018.
Oludda oluwaabi lwategeeza nti nga April 5th, 2018, bweyali e Kigumba mu disitulikiti ye Masindi , Orobi yasangibwa n’emmundu kika kya AK 47 awamu n’amasasi 19 ekimenya amateeka kuba bino bikkirizibwa kuba mu mikono gya bitongole bya byakwerinda.
Orobi emisango yagyegaana nasindikibwa ku alimanda mu bbalakisi ye Makindye naye oluvannyuma nayimbulwa ku kakalu ka kkooti eno nga bw’alinda omusango okuwulirwa.
Omusango bwegaleeteddwa ku Lwokubiri mu maaso ga Ssentebe wa kkooti eno aliko kati Brigadier Freeman Robert Mugabe, akulira oludda oluwaabi olw’amagye Pte Anthony Phillip Olupot ne Lt Gift Mubehamwe bategeezezza kkooti eno nti balina ebiragiro okuggya enta mu musango guno.
“ Akulira eby’okuwaaba emisango atuwadde ebiragiro okuggya emisango ku Lt Gen Orobi. Atuwadde ebbaluwa tugiwe kkooti eno era tusaba kkooti egikkirize,” Olupot bw’ategeezezza kkooti.
Ssentebe wa kkooti eno Mugabe, ebbaluwa yagikkiriza era Lt. General Orobi naggyibwako emisango.
Okusinziira ku tteeka erifuga eby’okulwanyisa, singa omusango gw’okusangibwa n’ekyokulwanyisa gukusinga oba olina okusibwa emyaka 10 mu kkomera.