Bya Ssemakula John
Kampala
Akulira National Unity Platform (NUP) Robert Kyagulanyi amanyiddwa nga Bobi Wine atadde eggye ly’ eggwanga erya Uganda Peoples’ Defence Forces (UPDF) ku nninga lireete okujulizi bwonna obulaga aba NUP nga bawamba Eric Mwesigwa.
Kyagulanyi agamba nti bano batidde nga kati olw’okutya amawanga g’ ebweru okubateekako envumbo basazeewo kubizza ku kibiina ki NUP.
Kino kiddiridde omusajja Mwesigwa okulya ebigambo byeyali yayogera nga alaga nga eb’ebyokwerinda bwebamuwamba kyokka eggulo nategeeza nti NUP yeyamuwamba nemutulugunya nga bamusuubizza obukadde 50.
Mwesigwa eyalina ebiwundu mu kifuba mu kaseera kano era yagenda mu maaso nateekayo okwemulugunya kwe mu Uganda Human Rights Commission (UHRC) nga agamba nti yawambibwa ab’ebyokwerinda nebamutulugunya.
Ono era yagenda mu maaso naggulawo omusango ku poliisi ye Kabalagala nga agamba nti okuva lweyava gyebaali bamuwambira waliwo abantu abamugoberera.
Bwe yabadde ayogerako eri bannamawulire ku Lwokusatu, Omwogezi wa UPDF, Brig. General Felix Kulayigye yategeezezza nti NUP ebadde ekozesa omutimbagano okwonoona ekifananyi kya gavumenti okulaga nti ab’ebyokwerinda baayo bebatulugunya abantu.
Kulaigye yagasseeko nti aba NUP baali bagifuula nkola buli kadde okuleeta abantu abalina ebisago nga abamu babiggye mu bubenje nebabalaga bannamawulire nti bawambibwa nebatulugunyizibwa ab’ebyokwerinda ekintu ekitali kituufu.
Kyagulanyi bino yabiwankanyiza nategeeza nti buno obuzannyo bwakito bwebatadde mu nsonga z’okutulugunya bannansi era kino kikakasa nti amagye gegazze gatulugunya Mwesigwa n’abalala.
Bobi Wine asinzidde wano nasaba bannayuganda obutakkiriza bazanyira ku mutwe naye batunuulire ebikolwa bya UPDF ebiyise omuli okutemulwa kwa Yasin Kawuma mu Arua nga newano babateekako ogw’okubeera n’emmundu naye ezitamanyise gyezaalaga n’okutuuka kati.
Ono era abalaze ebyaliwo ku Moses Kibalama eyali abeefulidde kyokka oluvannyuma nakakasa kkooti nga bweyali asisinkanyeko nadduumira amagye g’eggwanga. Kuno agasseeko abantu nga Kakwenza Rukirabashaija ne Marinos awamu n’abalala ono agamba nti buli lwebamala okutulugunya omuntu babaako byebamugamba okugamba wakati mu kumutiisatiisa okumutta.