Bya Ssemakula John
Bulange – Mmengo
Ssaabasajja Kabaka Ronald Muwenda Mutebi asiimye empaka z’akamalirizo ez’ekikopo ky’ Amasaza wakati wa Busiro ne Buddu gizannyibwe ku ntandikwa y’omwezi ogw’okusatu nga 4, March, 2023 mu kisaawe e Wankulukuku.
Bino bibikuddwa minisita avunaanyizibwa ku bavubuka, ebyemizannyo awamu n’okwewummuza mu Buganda, Owek. Henry Ssekabembe Kiberu mu lukung’aana lwa bannamawulire olutudde mu Bulange e Mmengo ku Lwokuna.
“Njagala okutegeeza Obuganda bwonna nti Ssaabasajja Kabaka asiimye omupiira ogw’akamalirizo mu kikopo ky’Amasaza gubeerewo ku Lwomukaaga nga 4, Ogwokusatu, omwaka guno,” Owek. Ssekabembe bw’ategeezezza.
Owek. Ssekabembe agambye nti ku lunaku olwo emiryango gyonna gigenda kuggulwawo ku ssaawa 5 ez’emisana ate omupiira gutandike ku ssaawa 9 zennyini ez’olweggulo.
Minisita Ssekabembe era annyonnyodde nti omulamwa tegukyuusa nga gukyali ku basajja okubeera abasaale okulwanyisa akawuka ka Mukenenya bataase abaana ab’obuwala.
Okusinziira ku minisita Ssekabembe, omuntu asookerwako wakusasula emitwalo 2 ate abakungu bayingirire ku mitwalo 5 era Obuganda bwakutegeezebwa webayinza okuzigula nasaba abantu okujja mubungi.
Ono yeebazizza bannamikago okuli kampuni ya Airtel, BBS Terefayina awamu ne CBS FM, Abamasaza, olukiiko oluteesiteesi, obukiiko bwa ttiimu ez’enjawulo, FUFA awamu n’abawagizi olw’okuwagira enteekateeka eno mu ngeri ezitali zimu.
Mu ngeri yeemu Owek. Ssekabembe, ategeezezza nti Nnyinimu asiimye ne fayinolo y’ebika wakati w’Olugave n’ Endiga ebeerewo nga 11 ogw’okusatu, 2023 e Wankulukuku.
Mu mpaka z’okubaka ab ‘Engeye bakuzannya Ab’emamba Gabunga okusobola okusalawo ani atwala engabo. Ate Ekkobe lizannye n’Effumbe okuzuula anaakwata eky’okusatu
Ate era ab’Olugave bazannye ab’Ennyonyi Enyange okusobola okunoonya anakwata eky’okusatu.