Bya Ssemakula John
Kakyeeka – Mbarara
Pulezidenti Yoweri Kaguta Museveni awamu ne muganda we Gen. Salim Saleh baweereddwa omudaali gwa’Order of Katonga’ nga gumu gwegusembayo okubeera ogw’ekitiibwa mu Uganda, okumusiima olw’okutandika eggye lya UPDF.
Museveni omudaali bagumuweeredde ku mukolo gwa Tarehe Sita gw’okujaguza emyaka 42 bukya eggye lya UPDF litandikibwamu nga guno guyindidde mu kisaawe kya Kakyeeka e Mbarara ku Mmande era Ssaabalamuzi Alphonse Owiny Dollo yagumwambaza.
Ku mukolo guno ne Gen. Ivan Koreta awamu ne Brig Gen Bosco Omure nabo baweereddwa omudaali gwegumu okubasiima olw’ebyo byebakola ebyasobozesa eggye lino okutandikibwawo.
Bano ne Museveni bebalwanyi bokka abasigaddewo kwabo 28 abali mu Front for National Salvation(FRONASA) nga bano be bannayuganda abasooka okutendekebwa e Montepue mu Mozambique wakati wa 1976 ne 1978.
Abalwanyi bano 28 bebatandika ‘Uganda’s National Liberation Army (UNLA)’ eggye eryegatta n’Abakombozi abava e Tanzania okugoba Idi Amin. Bano oluvannyuma bakola National Resistance Army (NRA) elyakwata obuyinza mu 1986 era oluvannyuma nerifuuka UPDF.
Omudaali guno gwatuumiddw Katonga nga bajjukira olutalo olwamaanyi olwayindira okuliraana omugga guno oguli ku luguudo oluva e Kampala okudda e Masaka nga October 13, 1985.
Kino Gen Pecos Kutesa akikakasa mu kitabo kye , ‘Uganda’s Revolution, 1979-1986; How I saw it’ bweyalaga nti okusobola okuwamba obulungi balina okusalako Katonga basobole okulemesa basajja ba Tito Okello Lutwa okusindika eby’okulwanyisa mu nkambi y’Amagye eye Mbarara ne Masaka.
Era olunaku luno lukuzibwa buli mwaka nga Febraury 6, okusobola okujjukira omulimu amakula ogwakolebwa abalwanyi bonna abeewaayo okununula bannayuganda okuva mu bukulembeze obwali butagendera ku mateeka.