Bya Ssemakula John
Soroti
Poliisi e Soroti eri ku muyiggo gw’omusawo w’ekinnansi agambibwa okubaako gwawa eddagala erikwata ababbi b’ente kyokka neriviirako abantu abalala 2 okufa.
“Bwebabadde bakola eddagala lino, abaana b’omusajja ow’emyaka 60 eyabadde anonye eddagala, Joseph Emolu, okuli Michael Etunu ne Levis Okello bazirise nekireetawo okusoberwa,” Omwogezi wa poliisi mu ggwanga Fred Enanga bwe yategeezezza.
Wano omusamize yagambye kitaawe w’abaana bano nti agenda kubayamba okudda engulu era wano yeefudde agenda okunoonya eddagala nayitamu nadduka.
Bweyabadde tanadduka, omusamize yasoose kusaba Emolu obukadde bwa Siringi 2 zimusobozese okukola eddagala eryabadde lirina okuzza batabani be engulu.
Enanga agamba nti wadde ono ssente zamuweereddwa naye teyakomyewo era bwebatyo abaana ba Emolu nebamufaako.
Poliisi egamba nti etandise omuyiggo gw’omusamize ono agambibwa okuba nti yadduse e Soroti nagenda e Kapelebyong nga baagala ku nfa ya bano era lwaki abadde ajjanjaba nga talina lukusa.
Enanga era alabudde abantu okunoonya obuyambi mu basawo b’ekinnansi ku bizibu byebalina naye beeyambise Poliisi n’amakubo amalala.