Bya Ssemakula John
Masaka – Buddu
Ababaka ba Palamenti okuli Allan Ssewanyana owa Makindye West ne Muhammad Ssegiriinya owa Kawempe North tebalabiseeko mu kkooti enkulu e Masaka okusobola okusaba okweyimirirwa nga bwekyali kyasalibwaawo kkooti gyebuvuddeko.
Kino kiddiridde bannamateeka b’ ababaka okuli Erias Lukwago okutegeeza bannamawulire ng’omulamuzi Lawrence Tweyanze awamu n’omuwaabi wa gavumenti Richard Birivumbuka bwebatalina nsonga yonna gyebawadde lwaki kkooti tetudde olwa leero.
“Ababaka bonna tebaleeteddwa mu kkooti era omuwaabi wa gavumenti talina nsonga gyawadde naye kyeraze nti kkooti si neetegefu kuwulira musango guno nga bweyali yasuubiza,” Omuloodi Lukwago bw’agambye.
Okusinziira ku Lukwago omuwaabi wa gavumenti ategeezezza Omulamuzi nti abadde teyeetegese kusobozesa musango guno kugenda mu maaso nasaba omulamuzi akkirize kkooti esooke ewulire omusango oguvunaanibwa bano e Kampala ogwe Masaka banaaguddira.
Kati okusaba kw’ababaka bano okulaba oba beeyimirirwa kujja kuwulirwa nga February 13 era munnamateeka Caleb Alaka agamba alina essuubi nti ku luno abantu ababwe bakuyimbulwa.
Ssewanyana ne Ssegiriinya babadde mu nkomyo ebbanga erisukka omwaka ku misango gy’obutemu, okugezaako okutemula n’okwenyigira mu bikolwa by’obutujju eby’ebijambiya ebyali e Masaka ne Lwengo mu 2021.