Bya Ssemakula John
Kibuli – Kyaddondo
Omulangira Mbuga Dr. Kassim Nakibinge Kakungulu avumiridde omulugube ogususse mu bantu ennaku zino nasaba buli omu amatire nekyo ky’alina.
Jjajja w’ Obuyisiraamu Nakibinge bino abyogeredde mu nsisinkano gy’abaddemu n’abavubuka ba Nkobazambogo okuva ku Ssettendekero wa Islamic University in Uganda (IUIU) ebadde mu makaage e Kibuli ku Lwokuna.
Omulangira Nakibinge agamba nti ensangi zino abantu tebakyalina nsonyi nga bavaabira buli ekibayita mu maaso nebamaliriza nga balumizza abalala.
Ono asabye abavubuka bano okwewala emize gino basobole okufuna emirembe mu nsi era bawangaalire mu bulamu obulimu emirembe.
Bano abasabye banyweze emisomo, bakulembeze empisa mu byebakola, babeere beerufu ate beenyigire mu nsonga z’obukulembeze n’ebyobufuzi basobole okukyuusa ensi okudda ku kkubo etuufu.
Omulangira Nakibinge era abakuutidde okukuuma ennono n’obuwangwa bwabwe bweba baagala okutuuka ewala mu byebakola nebyo byebasoma era bulijjo balwane okulaba nga beekiririzaamu.
Abavubuka bano beebazizza Omulangira Nakibinge olw’okubalambika obulungi era nebamusuubiza bulijjo okulemera ku nsonga za Buganda mu mbeera yonna.
Bano babadde bakulembeddwamu Ssentebe wa Nkobazambogo mu Uganda, Benon Mutebi, ssentebe wekibiina mu ttendekero nolukiiko lw’ekibiina Ibrahim Kateregga Musanje ne Hajji Mustafa Walugembe.