Bya Francis Ndugwa
Bulange – Mmengo
Bannayuganda aba ‘Ganda Boys’ Denis Mugagga ne Daniel Ssewagudde, abakoze ebyafaayo mu kisaawe ky’ okuyimba oluvannyuma lw’okukuŋŋaanya kkwaaya ku Ssemazinga 6 nebayimba Ekitiibwa kya Buganda, olwa leero bakiise embuga.
Bano basisinkanye Nnaabagereka Sylvia Nagginda, Katikkiro Charles Peter Mayiga awamu n’abakungu e Bulange e Mmengo nebawera okwongera okutambuza ensonga za Buganda.
“Omulimu gwebatukoledde mulungi nnyo era wadde mubalabye kati naye tubadde tukolagana emyaka 10 egiyise kuba baagala nnyo Buganda era baagala okulaba nga Buganda n’abantu bakulaakulana n’ennono esobola okukula,” Nnaabagereka Nagginda bw’ategeezezza.
Nnaabagereka annyonnyodde nti ennono ya Buganda teyamba baganda bokka naye n’abantu abalala mu nsi yonna naddala okusobola okuzza Obuntubulamu mu bantu.
Katikkiro Mayiga bw’abadde ayogerako gyebali ategeezezza nti mu lugendo lw’okuzza Buganda ku ntikko buli omu aliko olugendo lwe era neyeebaza aba Ganda Boys olw’okukozesa ekitone ky’okuyimba okutumbula Buganda.
Owek. Mayiga ategeezezza nti akyasuubira ebirungi bingi okuva mu bavubuka bano.
Aba Ganda Boys nga bakulembeddwamu Mugagga bategeezezza nti olunaku lw’okuloopa olutabaalo babadde balulindiridde era nebeeyama okufuula Buganda ensonga yonna gyebabeera.
Okusinziira ku Mugagga ne Ssewagudde bagamba nti abantu baagadde nnyo okumanya ebikwata ku Buganda era bakkiriza nti ennono za Buganda ng’ obuntu bulamu zezimu kuzisobola okutaasa ensi mu buzibu bwerimu kati.
Mugagga agamba nti bakugenda mu maaso n’okubuulira enjiri ya Buganda era bakkiriza nti ennyingo ez’enjawulo ez’obuntu bulamu zakukyuusa ensi.