Bya Ssemakula John
Kampala
Akulira ekibiina ki National Unity Platform (NUP), Robert Kyagulanyi amanyiddwa nga Bobi Wine awummuza abakulembeze b’ekibiina 4 mu kitundu kye Busoga nga abalanga okusiga enjawukana n’entalo mu kibiina ekikontana ne Ssemateeka.
Abayimiriziddwa kuliko, amyuka omukunzi w’ekibiina mukitundu kye Busoga, Moses Bigirwa, Ssentebe w’ekibiina mu kibuga Jinja Saulo Nsongambi n’omukwanaganya w’ekibiina mu kitundu kya Busoga Bamu Lulenzi.
Abalala kuliko Jamal Ayagalaki ng’ono ye mukwanaganya w’abavubuka e Busoga ne Andrew Muwanguzi owa mwoyo gwa ggwanga mu kitundu kino.
Okuwummuzibwa kwa bano kuyisiddwa mu kiwandiiko ekiteereddwako omukono gwa Ssaabawandiisi w’ekibiina, David Rubongoya.
“Pulezidenti wa National Unity Platform ayimirizza mbagirawo abakulembeze bano wammanga era nalonda akakiiko akagenda okubanoonyerezaako era balambike ekibiina ku kirina okuddako,” ekiwandiiko kya Rubongoya bwekisomye.
Bigirwa ne banne basongeddwamu olunwe okubeera emabega w’entalo n’enjawukana eziri mu kibiina naddala mukitundu kye Busoga.
Ssaabawandiisi Rubongoya agamba nti ensonga zino zitatanye erinnya ly’ ekibiina ekikontana n’amateeka agafuga abakulembeze b’ekibiina.
Okusinziira ku Rubongoya bano beeyambisa emikutu gy’ Omutimbagano awamu n’Amawulire okutatana ekifaananyi ky’ ekibiina era wadde bano bagezezaako okwogera nabo babadde tebafaayo bwebatyo nebasalawo okubaako kyebakolawo.
Kati bano balabuddwa obutabaako mulimu gwonna gwebakola kulwa kibiina okutuusa nga akakiiko akateereddwawo nga kamaliriza okunoonyereza nekafulumya alipoota.
Akakiiko kano kakulemberwa Jolly Mugisha, namyukibwa omubka Aisha Kabanda era Rubongoya agamba nti akakiiko kano buli kimu kagenda kikolera mu musana era wajja kubaawo obwenkanya.