Bya Francis Ndugwa
Bulange – Mmengo
Katikkiro Charles Peter Mayiga ayanjuliddwa Omutaka omuggya Henry Kulubya ayasikidde Kiggye, Paul Daniel Mbazzi eyazaama ku ntandikwa y’omwezi guno ogwa Ntenvu.
Omutaka Mbazzi bamwanjulidde mu Bulange Mmengo ku Lwokusatu era Katikkiro w’ ekika ky’ Empewo Ssaalongo Musisi Kalemba yamutuusizza ewa Katikkiro Mayiga.
Wano Mukuumaddamula Mayiga akubirizza abaganda okukozesa embeera eriwo okulaakulanya ebika byabwe era bafube okutambula n’omulembe baleme kwesiba ku byadda basobole okugenda mu maaso.
Owek. Mayiga akkikaatiriza nakaatiriza obukulu bwebika mu muyungagano ogavva edda naalabula nti obukulembeze bwekika sibwakirwanire.
Okusinziira ku nnono yekika kyempeewo alya obukulu bwekika buliibwa mu mpalo era bano bava mu masiga ana (4) kwago 30 agali mu kika kino. Amasiga gano kuliko erya Nunda, Kinonko, Mpiima ne Kiyimba.
Omutaka Kiggye Paul Daniel Mbazzi yaabadde Kiggye ow’e 13 era oluvannyuma lw’okuva mu bulamu bw’ensi bababdde balina okutuula balonde Kiggye omulala anakumaakuma abazzukulu n’okutwala mu maaso ensonga z’ekika.
Ye minisita avunaanyizibwa ku nnono n’obuwangwa, Owek. David Kyewalabye Male yeebazizza ab’Ekika ky’ Empewo olw’okukola enteekateeka eno mu bwesimbu.
Okusinziira ku minisita Kyewalabye agambye nti batandise ennono y’okuwandiika ennono n’okukuba ebirayiro ebiwera okugondera Nnamulondo era emikolo gyonna egikolebwa ku mutaka nga azaamye gigenda kuba gikolebwa Bwakabaka so si famire ye okusobola okunyweza ekitiibwa n’obulombolombo.
Kigye Henry Kulubya kati alindiridde kwanjulwa eri Maasomoogi ate ye Omutaka Paul Daniel Mbazzi waakuterekebwa olunaku lwenkya e Bubiro ku butaka bwekika kino mu ssaza Kyaggwe.