Bya Ssemakula John
Poliisi mukitundu kya Aswa etandise okunoonyereza ku kabenje akaguddewo eggulo ku Mmande nakafiiramu abasajja baayo babiri balamba nekaleka abalala 11 nga bapooca n’ebisago ebyamaanyi mu ddwaliro lya Lacor e Gulu.
Abavunaanyizibwa ku poliisi mu ttundutundu lino bagamba nti akabenje kagudde ku kyalo Lapuda mu ggombolola ya Paicho mu disitulikiti ye Gulu nga kano kavudde ku kabangali yabwe ey’ekika kya Land Cruiser nnamba UP 5568 okwefuula neyevulunga.
“Emmotoka yefudde bava Gulu nga bagenda mu Agogo ku mirimu bwetyo netta abapoliisi babiri okuli Pius Epodoi nnamba 70210 ne Marvin Odong nnamba 52736,” Omwogezi wa poliisi y’ ebidduka mu ggwanga Faridah Nampiima bw’ategeezezza bannamawulire ku Lwokubiri.
Nampiima agamba nti wadde tebanazuula kabenje kano kwekavudde naye bateebereza nti kavudde ku kuvuga ndiima.
Okusinziira ku Nampiima abafunye ebisago kuliko; Joseph Okalebo, Jacob Odong, Junior Peter Opio, Keneth Omara, Daniel Okello ne James Candia.
Abalala kuliko; George Okura, Simon Ochora, Vincent Ekoju, Vincent Awuzu, John Okwera, Abraham Okure ne Calvin Torach eyabadde ddereeva.