Bya Ssemakula John
Kampala – Kyaddondo
Ebipya bizuuse ku batemu abasse abadde akulira abakozi ba gavumenti mu disitulikiti ye Bukwo, Charles Ogwanga era poliisi egamba nti bano babadde tebamumanyi era kata abasimattuke singa teyabadde waleti ye .
Bw’abadde ayogerako eri bannamawulire, omwogezi wa poliisi mu ggwanga Fred Enanga agambye nti bano oluvannyuma lw’okukitegeera nti ye Ogwanga gwebabadde banoonya, emmotoka ye bagikubye amasasi 26.
Kino kiddiridde abatemu, okukuba emmotoka Ogwanga gyeyabadde atambuliramu ku luguudo lwa Bombo n’emmotoka ye nekwata omuliro, ono yaddusiddwa mu ddwaliro ly’amagye e Bombo gyeyafiiridde.
Okusinziira ku Enanga, poliisi byeyazudde biraga nti ku lunaku lwennyini lwebamulumba, Ogwanga yali ava Bukwo nga agenda Mbale ne ddereeva we Eric Chemsto era baali mu mmotoka ya gavumenti nnamba UG 0865Z era bweyatuuka e Mbale yali ayagala kusooka kugenda Lira kyokka oluvannyuma yasalawo okudda e Kampala.
Yalina ensonga ez’okukolako e Buziga, Kisasi, Bweyogerere awamu ne Kireka era poliisi egamba nti yamaze dda okumanya abantu abasisinkanako ne Ogwanga mu kaseera nga ali Kampala.
Oluvannyuma lw’ensisinkano zino, Ogwanga yaleka ddereeva w’ e Kireka olwo nayolekera oluguudo oludda e Bombo era kkamera za poliisi zamukwata e Bwaise nga mu mmotoka alimu yekka, wuuyo Bwaise, Kawempe ne Kagoma gyeyamala essaawa emu n’ekitundu.
Enanga agamba nti kkamera ziddamu okumukwata nga ali Kiryagonja awamu ne Kiryowa gyeyasanga abatemu nebamuyimiriza.
“Bweyayimiriza emmotoka , abasajja basemberera emmotoka ye nebamubuuza wa Mw. Ogwanga gyasigadde, yabaddamu nti ye ddereeva era wano bafuna Waleti era nebamuggyako n’essimu ye era wano webakakasizza nti gwebabadde balinda era wano baddako emabega nebatandika okumukuba amasasi,” Enanga bw’agambye.
Poliisi etegeezezza nti bino byabategeezeddwa omu ku basawo mu ddwaliro e Bombo Military Hospital eyakola ku mugenzi nga yakatuusibwayo.
Bano bannyonnyodde nti baliko byebafunye okuva ku bantu abalala babiri abaali batambulira ku Pikipiki nnamba UFF 849F nga nabo bali badda Bombo mu kaseera ettemu lino welyabeererawo.
Poliisi egamba nti amasasi olwavuga bano basuulawo Pikipiki nebeyokya ensiko okutaasa obulamu naye omu ku bo yalina essimu era byonna ebyakolebwa yabikwata ku ssimu ye.
Enanga akakasizza nti ettemu lino lyali litegeke era si bubbi nga bwebasooka okulowooza, ono agasseeji nti baliko abantu 4 bebakutte omuli ddereeva wa Ogwanga awamu n’omuntu omulala gwebasanga mu nsiko nga ettemu lino lyakabaawo.