Bya Ssemakula John
Kampala
Poliisi ya Kira Road ekutte ababoodabooda abaweze 44 lwakuvugisa kimama awamu nobutagoberera mateeka ga nguudo.
“Akulira poliisi y’ebidduka e Kira Road akoze ebikwekweto bya boodabooda amakya ga leero nekwata abavuga obubi wamu nabavuga nga tebambadde bikoofiira, kubano 38 baweereddwa engasi ey’obuliwo ate 3 nebalabulwa ate 3 bakyakuumirwa ku poliisi eno” Omwogezi wa poliisi y’ebidduka Faridah Nampiima bw’ategeezezza ku bikwekweto bino.
Abamu ku ba boodabooda beemulugunyiza ku ngeri gyebakwatiddwamu nga bagamba nti babakwatidde nsonga ndala kyokka olutuuse ku poliisi nebalagirwa okusasula engasi mu bbanka.
Ku ntandikwa y’omwezi guno, poliisi yategeeza nti egenda kukola ebikwekweto eby’enjawulo ku bavuzi ba boodabooda abavuga obubi kuba bateeka obulamu bwa bannayuganda mu matigga.
Nampiima bweyali alangirira ebikwekweto bino yagamba nti tebajja kuganya wa booda atikka musaabaze asoba mw’omu, abatalina bikoofiira awamu ne Pikipiki eziyitirdde obukadde.