Bya Ssemakula John
Bulange Mmengo
Katikkiro Charles Peter Mayiga akyazizza ababaka b’amawanga ga Bulaaya abeegattira mu mukago gwa European Union nebateesa ku ngeri ez’enjawulo gyebasobola okukwataganamu okusobola okutumbula embeera z’abantu mu Buganda ne Uganda.
Ensisinkano eno eyindidde mu Bulange e Mmengo ku Lwokutaano nga ababaka bano babadde bakulembeddwamu Ambasada Atilio Pacifico.
“”Tubadde bamukisa okwaniriza ababaka b’amawanga ge Bulaaya okuva e Belgium, Germany, Sweden, Ireland ne Netherlands, twogedde ku nsonga nga 8 esooka; omwana omwana omuwala okufuna embuto, abaana abawala bafuna nnyo embuto mu muggalo era Obwakabaka n’ababaka b’amawanga gano tulowooza nti omwana alemwe kumibwa mukisa kumaliriza misomo gyabwe kuba omwana okuzaala nga akyali muto kyakabi naye bwatasoma gubagujabagidde,” Owek. Mayiga bw’ annyonnyodde.
Owek. Mayiga agamba nti ku nsonga y’ebyenjigiriza bawagira ekya baana okubasusa ebibiina okusobola okuliyirira emyaka gyebafiirwa kuba singa abaana tebasoma olwo eggwanga libeera mu buzibu.
Ono agambye nti ku nsonga ya ssente ezinabuuse ennyo balowooza nti singa gavumenti ekendeeza ku nsaasaanya n’emisolo gyeteeka ku bantu kisobola bulungi okutaasa embeera kuba ebbanga abantu lyebamala nga tebakola mu muggalo lyakosa nnyo ebyenfuna.
Kamalabyonna Mayiga ategeezezza nti ku nsonga y’okugemesa ekirwadde ki COVID-19 bakaanya bulungi nnyo n’ababaka bano abantu bonna abali waggulu w’emyaka 18 okugenda bagemebwe naye tebawagira kyakugema baana bato awatali lukusa lwa bazadde.
Ku ttaka, Katikkiro Mayiga ategeezezza nti ebyetaaga okutereezebwa ye woofiisi ye ttaka, poliisi efune obukugu, kkooti ziramule ensonga zino mu mangu, abantu bakubirizibwe okuliikiriza ettaka nga balunda, gavumenti ekomye okweyingiza mu misango gy’ettaka kuba Mayiro si kyekizibu.
Owek. Mayiga alambise nti ku nsonga y’abantu abeeyongera ennyo mu ggwanga, Buganda erowooza nti kivudde ku bwavu kuba omwavu abeera n’ebiseera ebizaala bingi era nasaba bakwatagane n’omukago guno okuyamba abantu bagaziye ku nyingiza yabwe basobole okufuna eby’okukola.
Ensonga endala ly’eddembe ly’obuntu , ku kino Kamalabyonna Mayiga ategeezezza nti basaba gavumenti ebonereze abatyoboola eddembe ly’obuntu era eyongere amaanyi mwabo abakwasisa amateeka n’ebiragiro okuziyiza ebikolwa bino.
Akulembeddemu b’Ambasada bano, Atilio Pacifico, yeebazizza Katikkiro Mayiga olw’ensisinkano eno nategeeza nti ebayambye nnyo okumanya ekituufu ekigenda mu maaso mu ggwanga naddala nga bakyalira Obwakabaka okumanya Uganda gyevudde wamu nejjeraga.
Ensisinkano eno yeetabiddwamu Minisita Prosperous Nankindu Kavuma ne Minisita ow’emirimu egy’enkizo mu Buganda, Owek. David Mpanga.