Bya Francis Ndugwa
Bulange – Mmengo
Katikkiro Charles Peter Mayiga asabye omubaka wa Pulezidenti mu Kampala, Nanziri Amina Lukanga, okukoma ku bantu abeerimbika mu bakozi ba gavumenti awamu n’abasirikale nga baagala okunyaga ettaka lya Buganda mu Kampala.
Okwogera bino abadde asisinkanye omubaka wa Pulezidenti mu Kampala, Nanziri Amina Lukanga awamu n’ababaka ba Pulezidenti mu divizoni za Kampala mu Bulange e Mmengo ku Lwokubiri.
“Ekimu ku bizibu bya Buganda mu Kampala ly’ettaka. Olw’okuba ebintu bya Buganda byaffe fenna buli omu alowooza nti alina eddembe okwegabanya wonna webaagala.Bwetukolagana obulungi tusobola okuziyiza ababbi bano kuba bo tebaagala kutambulira mu makubo agamateeka, ensonga zino bwonozitegeera netutabulira wamu tujja zigonjoola mangu,” Owek. Mayiga bw’agambye.
Owek. Katikkiro Mayiga ategeezezza nti emivuyo gino giwa gavumenti ekifananyi ekibi nga bekweka mu basirikale n’abakozi ba gavumenti.
Kamalabyonna ono amusabye abakolera mu bifo bya Buganda okuli amasomero, amalwaliro n’obutale okutereeza obusenze bwabwe, bajje embuga bafune liizi kiyambe okulongoosa enkolagana wakati wa Buganda ne gavumenti.
atikkiro Charles Peter Mayiga ategeezezza nti omulimu gwa bano omukulu kwekuyunga bannakampala ne gavumenti okusobola okukuuma obutebenkevu awamu n’okulaakulana.
Okusinziira ku Katikkiro, obukulembeze bwetaaga okuwuliziganya ku mitendera egy’enjawulo bakulaakulanye bannansi.
Mukuumaddamula asabye abakulembeze bano okukkiriza okuwuliriza awamu n’okuyiga ku nsonga zebatamanyi kuba okuyiga tekukoma, abasabye beeyunge ku bakulembeze b’abavubuka mu Buganda basobole okumanyigana wamu n’okuwabulagana.
Abeebazizza okugula emijoozi gya Kabaka egiweza emitwalo 50 okwetaba mu misinde gya Kabaka era namusaba yenyigire mu lutalo lw’okulwanyisa Mukenenya nga amugatta kwebyo byalina okukola .
Omubaka wa Pulezidenti mu Kampala, Nanziri Amina Lukanga, ategeezezza nti babadde balina okuvaayo okuwulira ekiragiro kya Kabaka okutumbula eby’obulamu mu bantu be awamu ne Uganda yonna.
Kulwa banne RCC Nanziri yeeyamye okukolagane ne Buganda era nasaba bawabulwe era babalung’amye singa wabaawo ensonga.
Minisita avunaanyizibwa ku buwangwa n’ennono awamu n’ebyokwerinda, Owek. David Kyewalabye Male ategeezezza RCC nga bwewaliwo abasirikale abasomye okusanyaawo ebifo bya Buganda mu Kampala era nasaba omubaka wa Pulezidenti okulondoola ensonga eno.
Ensisinkano eno yeetabiddwamu Minisita Noah Kiyimba, Ssaabawolereza Christopher Bwanika, omubaka wa Pulezidenti e Lubaga Anderson Burora, Doreen Kaita owa Makindye, Dr. Kassim Kamugisha owa divizoni ye Nakawa, Yasin Ndidde wa Kampala Central ne Jjuuko Sulaiman.
Emisinde gy’omulundi guno gigenda kutambulira wansi w’omulamwa,”Abaami tube basaale tulwanyise Mukenenya tutaase abaana ab’obuwala.’