Bya Ssemakula John
Kabarole
Abantu abawera 20 be bagambibwa okufiira mu kabenje ku makya ga leero oluvannyuma lwa bbaasi ya kampuni ya Link nnamba UBA 003S okwefuula bwebadde eva e Fort Portal ng’edda e Kabarole.
Poliisi ekakasizza akabenje kano era okusinziira ku mwogezi wa poliisi y’ebidduka Faridah Nampiima akabenje kano kaguddewo ku ssaawa 4 n’ekitundu ku Lwokusatu ku makya.
“Bbaasi ya Link ebadde edda Kampala ng’eva Fort Portal, akabenje kano kagudde kilomita 2 okuva mu kibuga kye Fort Portal mu kifo ekimanyiddwa nga Ssebitoli. Abantu 20 bebakakasiddwa okubeera nti bafudde ku bano 13 bantu bakulu ate 7 baana. 11 ku bano basajja ate 9 bakazi, ebibakwatako bijja kubategeezebwa,” Nampiima bw’agambye.
Nampiima agamba nti abafunye ebisago baddusiddwa mu ddwaliro lya Buhinga okufuna obujjanjabi obusookerwako ate emibiri gy’abagenzi negitwalibwa mu ggwanika lye ddwaliro lino.
Ono annyonnyodde nti bakufulumyawo alipoota ku bivuddeko akabenje kano.