Bya Ssemakula John
Kampala
Ekitongole ekivunaanyizibwa ku bantu abayingira n’okufuluma eggwanga mu Minisitule y’ensonga ez’omunda mu ggwanga kitegeezezza nti kitubidde ne Paasipooti eziwera omutwala mulamba nga bannanyizo bakyalemeddwa okuzinonayo.
Bweyabadde ayogerako eri bannamawulire ku Mmande, omwogezi wa Minisitule eno Simon Mundeyi yategeezezza nti wadde bannayuganda bangi basaba Paasipooti naye tebaziggyaayo ekizireetedde okwetuuma.
“ Tulina Paasipooti ezisukka omutwalo eziremedde e Kyambogo kuba bannyinizo tebanazinonayo,” Mundeyi bwe yagambye.
Ono yannyonnyodde nti olw’okuba bafuna enyiriri mpanvu buli kaseera, basazeewo okuteekawo ebifo ebirala okugatta kwebyo byebalina kiyambeko okwanguyiza abaagala okufuna Paasipooti zino.
Mundeyi asabye bannayuganda abaasaba edda Paasipooti zabwe okuzinona kuba wadde bagezezaako okubaweereza obubaka ku ssimu okubategeeza nti zaafuluma naye tebazinonyeeyo.
Yannyonnyodde nti olw’okuba nnyingi ekifo webazitereka watandise okufunda ekitandise okubakaluubiriza.