Bya Francis Ndugwa
Bulange – Mmengo
Minisita avunanyizibwa ku kikula ky’abantu n’ebyobulamu mu Buganda Owek. Dr. Prosperous Nankindu Kavuma ategeezezza nti Nnyinimu Ssaabasajja Kabaka asiimye okulabikako eri Obuganda mu lukuƞƞaana lwa Ttabamiruka w’Abakyala omwezi ogujja.
Bino Owek. Nankindu abyogeredde mu Bulange e Mmengo ku Lwokubiri bw’abadde atongoza olukiiko olugenda okutegeka Ttabamiruka w’Abakyala mu Buganda, oluvannyuma lw’okumala emyaka 2 nga tategekebwa olw’ omuggalo ogubaddewo.
“Naye tuli basanyufu nti Beene yasiimye tugende mu maaso tuteeketeeke, tugenda kubeera naye nga 13/ 05/2022 ku Imperial Royale Hotel. Tugenda kusanyuka nnyo ng’abakyala kubanga Omutanda yasiima nti tumufuna omulundi gumu buli mwaka,” Minisita Nankindu bw’ategeezezza.
Minisita Nankindu era agambye nti ku mulundi guno eby’obulamu byebissiddwako essira wansi w’omulamwa, ‘ Abakyala abalamu bebasobola okuyiiya n’okwekulaakulanya’.
Owek. Nankindu agamba nti basuubira abakyala okuva mu bitundu bya Ankole, Busoga n’awalala era basuubira abagenyi lukumi okwetaba mu lukuƞƞaana luno.
Olukiiko olutongozeddwa lukulemberwa Dr. sarah Nkonge nga ssentebe n’amyukibwa Linda Ocheng n’abalala, era ono agamba nti kino kyekiseera omukyala okusituka okulaga obuvumu n’obusobozi bwe ku bintu eby’enkulaakulana n’obulamu bwa bulijjo.