Bya Musasi Waffe
Najjanankumbi – Kyaddondo
Pulezidenti w’ekibiina ki Forum for Democratic Change(FDC), Patrick Oboi Amuriat asabye gavumenti ennoonyereze ku bigambibwa nti abamu ku b’ebyokwerinda beekobana n’ababbi b’ente mukitundu kye Karamoja nebakola obulumbaganyi obufiiriddemu abantu abawera.
Amuriat ategeezezza bannamawulire ku kitebe kye kibiina e Najjanankumbi nti bafunye amawulire nti eky’okubba ente mukitundu kye Karamoja bakifudde mulimu era n’ab’ebyokwerinda bakyenyigiddemu.
“ Abamu ku bajaasi ba UPDF benyigiddemu . Twagala baveeyo mu lwattu boogere ekituufu ekigenda mu maaso e Karamoja era lwaki obubbi buno bweyongera buli lukya. Twagala wabeewo okunnoonyereza ku bantu abattiddwa ab’ebyokwerinda mu kitundu kino,” Amuriat bw’agambye.
Oboi ayagala abo abasangibwa ng’omusango gubasinga basimbibwe mu mbuga z’ amateeka bavunaanibwe wasobole okubaawo obwenkanya.
Okusinziira ku b’ebyokwerinda bakutte abantu abawera 1,626 era ku bano 291 bamaze dda okusimbibwa mu mbuga z’amateeka.
“Tunyolwa olw’ebifaananyi ebyabagambibwa okubeera ababbi b’ente ebisaasaanyizibwa oluvannyuma lwa Lt. Gen. Muhoozi Kainerugaba okulangirira nga bwagenda okulumba ababbi b’ente bano. Amawulire getufuna galaga nti waliwo obulamu bw’abantu abatalina musango obugendeddemu,” Amuriat bw’agasseeko.
Oboi agamba nti obubbi bw’ente buno busaasaanidde n’ebintu ebirala ebiriraanye Karamoja okuli Kapelebyong, Katakawi, Kumi, Bukedea, Abim ne Agogo era eno waliwo abantu abaluguzeemu obulamu kumpi buli lunaku.
Ono annyonnyodde nti gavumenti esaanye efube okulaba ng’ente ezinunulibwa ziddizibwa bannyinizo abatuufu era gavumenti ebeeko engeri gyeyamba abantu abakoseddwa n’okwononebwa ebyabwe.
Amuriat ayagala amawanga ageegattira mu EAC ne IGAD gabeeko kyegakola okutangira eby’okulwanyisa naddala emmundu okuyingira e karamoja okuva e South Sudan, Uganda, Kenya ne Ethiopia.