Bya Ssemakula John
Kampala – Kyddondo
Eyaliko omulamuzi wa kkooti ensukkulumu, Prof. George Kanyeihamba era eyakulira akakiiko k’ebyamateeka mu ‘Constituent Assembly’ okukola Ssemateeka wa 1995 awakanyiza eby’okukola ennongoosereza mu nnyingo 82 okuggyamu eky’okulonda Sipiika mu bwangu singa ekifo abaddewo ava mu bulamu bw’ensi.
Kino kiddiridde amaloboozi agawera okuvaayo nga gasaba ennoongosereza zikolebwa mu tteeka lino oluvannyuma lw’ okufa kwa Sipiika Jacob Oulanyah nga okusinziira ku tteeka tewali kirala kisobola kukolebwa mu Palamenti okuggyako nga Sipiika omuggya amaze okulondebwa.
Pulezidenti Museveni y’omu ku bawakanyiza kino nga bweyabadde ku mukolo gw’okulonda n’okulayiza Sipiika omuggya Anita Among, yategeezezza nti ekola eno siyabuntu bulamu nga omufu abeera alina okuweebwa ekitibwa sosi bantu kuvaayo kutandika kulwanira kifo kyabaddemu nasaba kino kitereezebwe.
Prof. Kanyeihamba agamba nti bwebaali bakola ssemateeka eno teyali nsobi nga abamu bwebalowooza era baalina ensonga lwaki bakireka bwebatyo.
Okusinziira ku Kanyeihamba wadde ng’ etteeka liragira omumyuka wa Pulezidenti okutwala obuyinza singa Pulezidenti abaddeko afa naye ku kya Sipiika kya njawulo kuba ekifo kino kifugibwa mu kulonda era asinga okuweza omuwendo gw’ababaka abamulonda yatuula mu ntebe eno.
Kanyeihamba asabye wabeewo okwebuuza nga ennongoosereza zino tezinakolebwa era bamanye lwaki abakola ssemateeka ensonga eno baalina okugireka nga bweri era ayagala bakomye n’okukola ennoongosereza mu Ssemateeka buli webabeera baagalidde.