Bya Ssemakula John
Kalangala – Ssese
Minisita w’abavubuka emizannyo n’okwewummuza mu Buganda, Owek. Henry Moses Ssekabembe Kiberu, asabye omukulembeze w’eggwanga Yoweri Kaguta Museveni okwekuba mu kifuba ayimbule bazzukulu be bonna abali mu makomera ku nsonga z’ebyobufuzi kuba tebalina musango.
Bino abyogeredde Ssese bw’abadde asisinkanye abakulembeze b’eggombolola ya Ssaabaddu Kasekulo nga akomekereza okulambula kw’abaddeko mu kitundu kino okumalidde ddala ennaku 4 ku mirimu emitongole egy’Obwakabaka.
Owek. Ssekabembe agamba nti embeera eriwo ereetera abantu obulumi ku mitima obutali bwangu kuwonyezebwa kyokka n’alabula abantu b’e Ssese okukomya okulonda abakulembeze abatagasa bwe baba baagala enkulaakulana okubatuukako.
Okusaba bwati kiddiride abakulembeze b’abavubuka mu ggombolola eno okumuloopera nga bannaabwe abawerako bwe bali mu makomera olwebyobufuzi ekireetedde n’abamu okutya okubyenyigiramu.
Kinajjukirwa nti Minisita Ssekabembe okulambula kuno yaakutandika ku Lwakuna lwa Ssabbiiti ewedde era nga ku bugenyi buno abadde akumaakuma abavubuka n’okubateekateeka mu ngeri ez’enjawulo ez’okukulaakulanya Obwakabaka n’okuzimba obukulembeze, ssaako okusisinkana abavubuka abakola emirimu egyenjawulo.
Owek. Ssekabembe yagguddewo ekyoto ky’abavubuka, emipiira gy’eggombolola za Kabaka egisokedde ddala n’asisinkana n’eyali Kweba Fr. Christopher Walusimbi e Bukasa.
Oluvannyuma minisita asisinkanye abakulembeze b’abavubuka b’olukiiko lw’essaza ly’e Ssese n’aba Buganda ng’ensisinkano eno ebadde ku mbuga enkulu era n’alayiza olukiiko olufuzi olw’essaza.
Abakulembeze bano baloopedde Minisita ku bavubuka b’ekitundu kino abafuna ssente wabula ne bazirya kivubi, ssaako okumulojjera ennaku gye bayitamu naddala mu by’obulamu nga batuuka n’okunoonya obupiira ne bubabula.
Ye omwami w’essaza ly’e Ssese, Kweba Augustine Kasirye akiikiriddwa omwami w’eggombolola, ono asabye Minisita Ssekabembe okubayambako naddala mu mipiira gy’Amasaza kubanga Abassese banyigirizibwa nnyo ebitagambika mu by’ensimbi.