Bya Ssemakula John
Lubiri – Mmengo
Abavubuka bakubiriziddwa okwewala okwetundako ettaka wabula balwane okulikuuma nga bayita mu kukolerako emirimu gy’enkulaakulana nga bettanira enteekateeka za Buganda balifunemu era bakyuse embeera zaabwe.
Okusaba kuno kukoleddwa Omulangira Felix Muteesa bw’abadde atikkula Amakula agaleeteddwa eggombolola ya Mutuba 4 Makulubita mu Lubiri e Mmengo leero ku Lwokuna.
” Ensonga y’ettaka Ssaabasajja Kabaka yatuteerawo ekitongole kya Buganda Land Board kale bannaffe tugende tuwandiise ebibanja byaffe, tufune ebyapa byaffe, balekere awo okutuyiikiriza ewaffe.” Omulangira Muteesa bw’ategeezezza
Omulangira Muteesa avumiridde ebikolwa by’okugobaganya abantu ku ttaka ebicaase ensangi zino kyoka n’asaba abo abawangaalira ku ttaka lya Beene okufaayo okunyweza obusenze bwabwe era n’abavubuka bakomye okutunda ettaka nga bagula Boodabooda.
Ono asabye abavubuka ba Kabaka okukola ennyo era beekume nga balamu nga beetangira ebirwadde ebizibu nga Mukenenya awamu Corona kuba akyaliwo.
Bano abaleese Amakula babadde bakulembeddemu eggombolola ya Mutuba IV Makulubita ng’ekulembeddwamu Omumyuka wa Kkangaawo owookubiri Nkonge Ddamulira Beene n’Omwami w’eggombolola eno Goliath Lumbuye .
Ye Katikkiro w’ebyalo bya Kabaka, Omuk. Moses Luutu asabye Pulezidenti Museveni okutema empenda okulwannyisa ekibbattaka ekicaase ensangi zino nga kino kyegiriisiza ne mu bitundu ebirina ettoffaali eddene bye ligatta ku gavumenti ye okuggya mu buyinza kyokka ne bitafiibwako.
Omwami w’eggombola eno, Lumbuye Goliath ategeezezza nti Bannabulemeezi bawulize eri Beene wabula n’avumiririra abantu abalinnyirira n’okutyoboola ennono za Buganda n’asaba bakolebweko kubanga kittattana ekitiibwa kya Buganda.
Amakula agaleeteddwa mubaddemu; emmere, ebibala, ebisolo n’ebintu ebirala.