Bya Ssemakula John
Kampala – Kyaddondo
Eyali Pulezidenti w’ekibiina kya Forum for Democratic Change (FDC ) atabukidde Ssenkaggale w’ekibiina kya Democratic Party (DP), Nobert Mao olw’okwekyusa n’atandika okulima banne abooludda oluvuganya empindi ku mabega ng’agamba nti bakukuta ne Pulezidenti Museveni mu kyama.
Besigye yasinzidde ku mutimbagano n’ategeeza nti Mao ayitiridde okutambuza obulimba era alabika nti awankawanka okubaako byafuna.
“Mao ali mu kuwankawanka na kutambuza bulimba! Naye amaanyi ogaggya wa Sseruganda? Sisisinkanangako Pulezidenti Museveni mu kyama oba okuteeseganya naye.” Dr. Besigye bwe yagambye.
Kino kiddiridde Mao okutegeeza nga Besigye bweyasisinkana Pulezidenti Museveni ne babaako enzikiriziganya kwe baatuuka.
“Abamu ku bakulira ebibiina bwe bali bannanfuusi nga bazze boogerezeganya ne Pulezidenti Museveni era ng’abatumira ababaka okuva mu NRM naye bwe badda mu bantu ne beefuula nga abamulinako obukyayi.” Mao bwe yategeezezza Munnamawulire Remmy Bahati eyabadde amubuuza ng’asinziira mu Amerika gy’awangaalira.
Ku nsonga eno, Dr. Besigye agamba nti Mao byajuliza kwe kwali okwogerezeganya okwali kutegekebwa wakati we ne Pulezidenti Museveni oluvannyuma lw’okumuteekako akazito mu kwekalakaasa kwa ‘Walk to Work’ okwaliwo mu 2011.
Besigye yannyonnyodde nti enteeseganya zino ezaali ziwomeddwamu omutwe bannamawulire Conrad Nkutu ne Andrew Mwenda nazo zennyini tezaaliwo olw’ensonga nti baali Museveni bamuwadde obukwakkulizo obuzibu ennyo.
“ Twalemera nnyo ku bwerufu, era nga twagala enteeseganya zizingiremu buli omu ate nga ziri mu lwatu era nga twagala Museveni alage bwategeka okuwaayo obuyinza eri omuntu omulala.” Besigye bwe yagasseeko.
Besigye agamba yeewuunyizza okulaba Mao ng’ategeeza nga bwe yabdde akikakasizza okuva ku Mwenda ne Nkutu awamu ne Pulezidenti Museveni nti ensisinkano eno yaliyo ekintu ekitalimu wadde ettondo ly’amazima.
Bino we bijjidde nga Mao azze avumirira ekibiina kya NUP n’akikulira Robert Kyagulanyi Ssentamu gw’agamba nti tamanyi bintu bwe birina kutambula mu kisaawe ky’ebyobufuzi era olw’okuba erinnya lye lye livuga ate nga tamanyi kyakukola akoze kinene okuserebya omutindo gw’ebyobufuzi mu ggwanga awamu ne demokulaasiya okutwaliza awamu.