Bya Musasi Waffe
Kampala
Ssaabasumba omuggya ow’Eklesia y’Abasodokisi, His Eminence Metropolitan Jeronymos Muzeeyi, yatikkiddwa olunaku lw’eggulo ku Ssande era bino bye bimu ku bitonotono ebimukwatako.
Ssaabasumba Jeronymos Muzeeyi yazaalibwa nga 18 March 1962 ku kyalo Bulopa mu disitulikiti y’e Kamuli mu maka g’Omwami Augustinos Kakombe n’Omukyala Agnes Biribawa era nga ye mwana omuberyeberye mu baana 4.
Ono okusoma kwe yakutandikira ku Kisaka Primary School gye yava ne yeeyunga ku Chwa II Memorial College e Kololo ng’eno gye yamalira secondary wakati w’omwaka 1969 ne 1984.
Mu 1985 yagenda ku ssomero lya Seminario yaba Orthodox mu ggwanga lya Kenya era ng’eno yakolako ng’omutegesi w’ebitabo.
Mu 1986 yagenda mu ssetendekero wa Anthens mu Buyonani n’akuguka mu by’eddiini era n’abikonolamu ddiguli mu 1995.
Ng’avuddeyo yatikkirwa Obudyankoni era wakati w’omwaka 1996 ne 1997 n’alondebwa okubera Vicar General w’essaza ly’Ekeresia ery’e Kampala ne Uganda yonna era oluvannyuma lw’omwaka gumu n’alondebwa okubeera Vicar General wa Bukoba e Tanzania.
Nga 24 November 1999 yalondebwa ku kifo ky’obwabisopu era n’atikkirwa nga 11 December 1999 okuweereza mu ssaza ly’Eklesia erya Bukoba mu Tanzania okutuusa mu 2007. Eno gye yalinnyisibwa okutuuka ku kifo ky’obwa Metropolitan okuweereza e Mwanza n’obugwanjuba bwa Tanzania ng’eno gye yalondeddwa olukiiko lwa Holy Synod ya Alexandria ne Africa yonna okubeera Ssaabasumba w’essaza ly’Eklesia eya Kampala nga 12 January 2022.
Mu buweereza bwe e Tanzania, Ssaabasumba Muzeeyi alina by’atuuseeko omuli okuggulawo Eklesia empya, okubatiza abakkiriza abapya abasoba mu mitwalo 3, okutikkira abasumba, okuzimba Eklesia ezisoba mu 100 ssaako okulabirira abali mu bwetaavu omuli bamulekwa, bannamwandu n’abakadde.
Ono era asobodde okuzimba amalwaliro e Bukoba, okuzimba amasomero n’okuweerera abaana, okuzimba amazzi ag’omulembe ssaako okuzimba ekkakkalabizo ly’emirimu eriweza obugazi bwa ssikweya mmita 2000.
Metopolitan Jeronymos Muzeeyi era mukugu mu nnimi eziwerera ddala 5 okuli; Oluyonani, Oluzungu, oOluswayiri, Oluganda n’Olusoga.