Bya Musasi Waffe
Kampala
Minisita w’ensonga z’omunda mu ggwanga, Maj Gen Kahinda Otafiire agamba nti Palamenti singa kagitanda n’ekola enkyukyuka mu Ssemateeka, Pulezidenti n’atandika okulondebwa ababaka; olwo emyaka etaano gye bamala nga balwana mu nsiko okuggyako gavumenti eyaliko, olutalo olwo luba teruliimu makulu wadde akatono.
Bino Otafiire yabyogedde ku wiikendi bwe yabadde awaayo pulojekiti ez’enjawulo ezakoleddwa eggye lya UPDF nga lijaguza emyaka 41 egy’olunaku lwa Tarehe Sita egyakwatiddwa e Mbale.
Otafiire agamba nti buno bubeera bufere bwennyini kuba NRM ekyagitwala mu nsiko kwali kulwanirira demokulaasiya n’okuwa bannayuganda eddembe lyabwe okwerondera omukulembeze gwe baagala nga bayita mu kalulu.
“Olwo olutalo teruba na makulu kuba ezimu ku zino ensonga zennyini ze zatutwala mu nsiko.” Minisita Otafiire bwe yagambye.
Ono era alabudde ebitongole by’ebyokwerinda okuli amagye ne poliisi okukomya okutulugunya abantu n’okubakuba kuba si nte era n’asaba kino kikome mu bwangu kuba kisiikuula bannansi emitima n’okunafuya gavumenti ya NRM.
Okusinziira ku Otafiire, poliisi n’amagye biringa bya nnyanja ebyetaaga amazzi okubeerawo era nga mu nsonga eno bannayuganda ge mazzi agalina okubibeezaawo.
Otafiire yagguddewo ekizimbe kya bibiina bisatu ku ssomero lya Manjiya Primary School, ekirala kya bibiina bibiri ku Umayoka Primary School awamu n’ekizimbe okuli kaabuyonjo n’ebinaabiro ebigenda okukozesebwa abakyala abasulirira okuzaala ku Bukigai Health Centre III.