Bya Ssemakula John
Kampala
Minisita w’abavubuka, ebyemizannyo n’okwewummuzaamu, Owek. Henry Ssekabembe asabye abavubuka okwettanira enteekateeka z’Obwakabaka ez’enjawulo omuli; ez’ebyenjigiriza, obwegassi kibayambe okukyusa embeera zaabwe.
Bino Owek. Ssekabembe abyogeredde mu kulambula ebifo ebitandise omulimu gw’okutendeka abavubuka bano ebyemikono ng’atandikidde Mulago abavubuka gye basomera eby’enfumba.
Owek. Ssekabembe agamba nti ku mulundi guno Obwakabaka butaddewo enteekateeka y’okusomesa abavubuka ebyemikono n’ekigendererwa ky’okumalawo ebbula ly’emirimu mu bavubuka.
Ono asabye abafunye omukisa wansi w’enteekateeka eno babeere balambulukufu nga bakola emirimu gyabwe nti y’engeri yokka ey’okuwangulamu ensi eno.
Kinajjukirwa nti Buganda yatta omukago n’ekibiina ekitaba banneekoleragyange ekya Private Sector Foundation Uganda ne wooteeri ya Protea, okutendeka abavubuka mu Bwakabaka emirimu gy’emikono omuli; okufumba, okubajja, okutunga n’ebirala okulaba nga bayambako gavumenti okuteekerateekera eggwanga.
Omu ku bavubuka abasoma eby’enfumba, Godfrey Sseguya yeebazizza Ssaabasajja Kabaka olw’okubawa omukisa guno era n’asaba bavubuka banne okukomya omunyooma emirimu era bafeeyo okujjumbira enteekateeka eno.
Ye omusomesa w’abafumbi, Francis Salituha annyonnyodde nti baakukola kyonna okuwa abayizi ebyo bye beetaaga basobole okwanguyirwa okwetandikirawo emirimu awamu n’okugifuna.
Amyuka Ssentebe w’abavubuka mu Buganda, Derrick Kavuma agambye nti enteekateeka eno egenda kubuna amasaza gonna agakola Obwakabaka okulaba ng’abavubuka batumbula embeera zaabwe.