Bya Ssemakula John
Kampala
Ekibiina kya Forum for Democratic Change (FDC) kitabukidde Pulezidenti Yoweri Museveni olw’okuddamu n’alonda Dr. Johnson Byabashaija ng’akulira amakomera mu ggwanga.
Kino kiddiridde Byabashaija okulondebwa ku kontulakiti ya myaka ebiri ku nkomerero ya wiiki ewedde.
Bwe yabadde ayogerako ne bannamawulire mu lukung’aana lwabwe olwa buli wiiki, omwogezi wa FDC, Ibrahim Ssemjju Nganda yagambye nti kino kikyamu era n’asaba Palamenti ereme kusunsula mukulu ono kuba akuze mu myaka.
“Byabashaija akuze era asussa emyaka 60 era tasaana kukulira makomera wadde okuweereza mu kitongole ekyo. Okulondebwa kwe kuli mu bukyamu.” Ssemujju bwe yagambye.
Okusinziira ku Ssemujju , Pulezidenti Museveni amanyi kimu kya ‘kufiira mu buyinza’ era endowooza emu yeetaaga kukysa bweriba eggwanga lyakutambula.
“Eno y’ensonga lwaki yaleka (Museveni) yaleka Emmaneul Tumusiime Mutebile okusigala mu woofiisi ng’emyaka gigenze naye ku Byabashaija tetugenda kukkiriza. Mujjukira Museveni yali agaanye ne Benjamin Odoki okulekulira nga Ssaabalamuzi.” Ssemujju bwe yagasseeko.
FDC esabye Palamenti okukola omulimu gwayo ejjukize Pulezidenti Museveni nti Byabashaija tagwanira kubeera mu woofiisi eno kuba yasussa dda emyaka egiragirwa.
Etteeka erifuga abakozi ba gavumenti erya ‘Uganda Public Service Standing Orders (2010)’ likugira omuntu yenna awezezza emyaka 60 omuntu aba asigaza omukisa gumu gwakuweereza ku kontulakiti era ebbanga linaabeera lya myaka ebiri.
Mu mwaka 2020, Pulezidenti Museveni yalonda Dr. Byabashaija okuddamu okuweereza mu kifo kye kimu okumala emyaka ebiri egyaweddeko ne kiwaliriza Pulezidenti Museveni okuddamu okumulonda.
Gye buvuddeko Pulezidenti Museveni yasiima Dr. Byabashaija olw’okukyusa ekifaananyi ky’amakomera ekiraze nti ebintu erudda eyo bitambula bulungi.
Dr. Byabashaija, yeegatta ku kitongole ky’amakomera mu 1983 n’afuuka agakulira mu 2005, era emabegako yategeeza nti tannakakasa nti omulembe omupya ogw’emyaka gya 90 gusobola okutambuza obulungi ebintu n’alaga nti yeetaagayo emyaka ebiri okubateekateeka.